«Ақтауда жұмысын жүргізген»: «Buyers Union» қаржы пирамидасына қатысты іс сотта қаралады
OTPANNEWS.KZ. - «Buyers Union» қаржы пирамидасының жұмысын ұйымдастырып, оған басшылық жасады деген күдікке ілінген 5 адамға қатысты тергеу аяқталды.
Бұл іс бойынша күдіктілер өз қызметін заңды етіп көрсету үшін тұтыну кооперативі мәртебесін пайдаланған көрінеді. Ірі бизнес орталықтарынан кеңселер жалдап, өңірлерде бөлімшелер ашқан.
Аталған кеңселер желісі Астана, Ақтау, Ақтөбе, Орал, Атырау, Көкшетау, Қарағанды, Тараз, Шу, Алматы, Шымкент қалаларында және еліміздің басқа да елді мекендерінде жұмыс істеген.
«Әлеуметтік желілер мен интернет платформаларында азаматтарға баспана немесе автокөлік сатып алу үшін «пайызсыз» қарыз алу, қолданыстағы несиелерін қайта қаржыландыру немесе Trade-in бағдарламаларын пайдалану мүмкіндігі жарнамаланған», - деді Қаржылық мониторинг агенттігінің баспасөз қызметі.
Алайда қарыз алудың басты шарттарының бірі кооперативке жаңа мүшелер тарту болған. Азаматтар бастапқы үлестік жарнасын төлегеннен кейін кезекке тұрып, оның жылжуы жаңадан қосылған қатысушылардың қанша ақша салғанына байланысты болған екен.
«Кооператив мүшелерімен жұмыс істеу үшін «TrustContact» және «TrustMe» цифрлық платформалары пайдаланылған. Олар арқылы келісімшарттарды онлайн жасасуға, жеке кабинетке кіруге, салған қаражатты және кезектің жылжуын бақылауға мүмкіндік берілген. Осылайша 332 азаматпен жалпы сомасы 562 млн теңгеден асатын келісімшарттар жасалған. Соттың рұқсатымен 6 автокөлікке, 5 513 USDT және 1 003 Futeres көлеміндегі криптоактивтерге тыйым салынды», - деді агенттіктің баспасөз қызметіндегілер.