Қазақстанда бірыңғай QR-код жүйесінің іске қосылуына бір ай қалды
Қазақстанда сатып алулар үшін төлем жасау жақын арада әлдеқайда жеңілдей түседі. Қазір QR-код арқылы төлем жасағанда сатып алушының қай банктің клиенті екені немесе сатушы қандай терминал пайдаланатыны маңызды болса, жаңа жүйе іске қосылғаннан кейін мұндай шектеулер жойылады, деп хабарлайды Otpannews.kz сайты Zakon.kz-ке сілтеме жасап.
Бүгін Қазақстан Ұлттық Банкі екінші деңгейлі барлық банктер 2026 жылғы 18 шілдеге дейін Банкаралық мобильді төлемдер жүйесіне қосылу жұмыстарын аяқтауы тиіс екенін мәлімдеді. Бұл талап жаңа «Банктер туралы» заңға енгізілген түзетулерде бекітілген және олар дәл осы күні күшіне енеді.
Егер жұмыстар жоспарға сәйкес аяқталса, 19 шілдеден бастап жүйе толыққанды режимде жұмыс істей бастайды. Бұл қазақстандықтардың күнделікті төлем жасау тәсілін айтарлықтай өзгертпек.
Банкаралық QR-төлемдерді енгізу кәсіпкерлерге әртүрлі банктердің бірнеше терминалын орнатуға кететін шығындарды азайтуға мүмкіндік береді. Ал азаматтар еліміздегі кез келген банктің терминалы арқылы QR-кодпен төлем жасай алады, – деп хабарлады Ұлттық Банктің баспасөз қызметі.
Бүгінде қазақстандықтардың көпшілігі банктердің мобильді қосымшалары арқылы QR-кодпен төлем жасауға үйреніп қалған. Алайда бұл жүйе әрдайым бірдей ыңғайлы бола бермейтінін экономист Төлеген Асқаров түсіндірді.
Әр банктің өз техникалық шешімі болды. Сондықтан сатып алушы кей жағдайда өзінің банк қосымшасы басқа банктің QR-кодын немесе терминалын қолдамайтын жағдайға тап болатын. Нәтижесінде басқа төлем тәсілін іздеуге немесе қолма-қол ақша алуға мәжбүр еді, – дейді экономист.
Бірыңғай жүйе іске қосылғаннан кейін мұндай шектеулер жойылады. Сатып алушы үшін басты мәселе картаны немесе мобильді қосымшаны шығарған банк емес, QR-код арқылы төлем жасау мүмкіндігі болады. Яғни, жүйеге қосылған кез келген банктің қосымшасы басқа банктің терминалымен жұмыс істеуі тиіс.
Жаңа өзгерістер кәсіпкерлер үшін де маңызды. Олар әртүрлі банктердің бірнеше шешімін пайдаланудың орнына қолма-қол ақшасыз төлемдерді қабылдаудың бірыңғай инфрақұрылымын қолдана алады.
Төлеген Асқаровтың пікірінше, бірыңғай QR-код тек күн сайын мобильді қосымшалар арқылы төлем жасайтын миллиондаған азамат үшін ғана емес, жалпы экономика үшін де тиімді.
Оның айтуынша, жаңа жүйе қолма-қол ақшасыз есеп айырысулардың ашықтығын арттырып, түптеп келгенде мемлекеттік қаржының тиімділігіне оң әсер етеді.
Дегенмен, барлық қазақстандық банк бірыңғай QR-кодтың енгізілуіне бірдей мүдделі емес. Экономистің сөзінше, банктердің жеке QR-жүйелері клиенттерді өз экожүйесінде ұстап тұруға көмектескен.
Егер адам өз банкі қосымшасын пайдаланса, сол банктің терминалдары арқылы төлем жасау оған ыңғайлырақ болатын. Ал басқа шешімдерді қолданғанда қосымша комиссиялар немесе белгілі бір шектеулер туындауы мүмкін еді, – деп түсіндірді Асқаров.
Бірыңғай стандарт енгізілгеннен кейін банктер енді өз төлем инфрақұрылымы арқылы емес, қызмет көрсету сапасы, бонустық бағдарламалар және қосымша сервистер арқылы бәсекелесуге мәжбүр болады.
