Бейбіт Жұқаев Оңтүстік Кореядағы турнирін сәтті бастады
Әлемнің 305-ракеткасы, Ақтау теннис мектебінің түлегі Бейбіт Жұқаев Пусан (Оңтүстік Корея) челленджер турнирін жеңіспен бастады, деп хабарлайды otpannews.kz.
Қазақпараттың жазуынша, жерлесіміз алғашқы айналымда АТР рейтингісінде 708-орында тұрған оңтүстіккореялық Юй Сун Пакпен кездесті.
Бірінші партия жергілікті спортшының есебіне жазылды - 6:4. Дегенмен бұдан кейін Бейбіт ойын тізгінін қолына алып, камбэк жасай білді - 6:4, 6:4.
Екі сағаттан астам уақытқа созылған тартысты бәсекеде Жұқаев 12 эйспен бірге 9 брейк-пойнттың тек екеуін ғана пайдаланды. Пак 12 эйс, 1 брейкпен (3 брейк-пойнт) көзге түсті.
Бейбіт Жұқаев ширек финалға шығу үшін әлемнің 110-ыншы, осы жарыстың 3-ракеткасы, жапониялық Шо Шимабукуромен сарапқа салады.
Қазақстандық теннисші осыған дейін Мексикадағы қос челленджер додасында ширек финалға дейін жетіп, екеуінде де жарыстың 1-ракеткасы, аустралиялық Джеймс Даквортқа жол берген еді.
Соның нәтижесінде кеше жаңартылған әлемдік рейтингіде Бейбіт 340-тан 305-орынға көтерілді. Қазіргі кезде ATP Live рейтингісінде ол 297-сатыға жайғасқан.
