Маңғыстаулық жас ғалым Президент қолынан марапат алды
Түпқараған ауданы Форт-Шевченко қаласының тумасы, жас ғалым Дидар Батрышев Қасым-Жомарт Тоқаевтың қолынан «Ерен еңбегі үшін» медалін алды, деп хабарлайды otpannews.kz.
Дидар Ғалымұлы – ғылым саласында өзіндік қолтаңбасын қалыптастырған білікті маман. Ол әл-Фараби атындағы Қазақ ұлттық университетінің физика-техникалық факультетін тәмамдағаннан кейін еңбек жолын ғылыми-зерттеу саласында бастап, әр жылдары жетекші ғылыми және басқарушылық қызметтерді абыроймен атқарды.
Ол қазіргі таңда ҚР Президенті жанындағы Ұлттық ғылым академиясының вице-президенті қызметін атқарып келеді.
Ғалымның негізгі ғылыми бағыттары – нанотехнология, наноматериалдар, кванттық есептеулер және плазмалық зерттеулер. Ол - басқарылатын термоядролық синтез мәселесін шешуге бағытталған бірегей ғылыми әдістің авторы.
Халықаралық деңгейде де белсенді жұмыс істеп, Еуропа, АҚШ, Азия және ТМД елдерінің жетекші ғалымдарымен бірлескен ғылыми жобаларды жүзеге асырып келеді.
