Ақтаудағы «Шадвал» лезгинка мектебі кезекті шығармашылық маусымын қорытындылады

Ақтауда Достық үйінің сахнасында «Шадвал» лезгинка мектебінің есептік концерті өтіп, ұжым өзінің жиырма үшінші шығармашылық маусымын қорытындылады. Іс-шара балаларды қорғау күніне орай ұйымдастырылды, деп хабарлайды otpannews.kz тілшісі.

Қазір мектепте бес жастағы балалардан бастап, ересектерге дейінгі шамамен 300 адам білім алады. Есептік концертке 200-ден астам өнерпаз қатысып, көрерменге әсерлі би бағдарламасын ұсынды. Кавказ биіне тән темперамент, көпшілік қойылымдар мен әр нөмірдің жоғары дайындық деңгейі көрермен назарын бірден аударды.

Ұжымды құттықтауға Қазақстан халқы Ассамблеясының өкілдері, сондай-ақ Маңғыстау облыстық Дағыстан халықтарының мәдени орталығының төрағасы, «Қазақстан дағыстандық этномәдени бірлестіктері қауымдастығының» жетекшісі Юсуп Шахшаев қатысты.

Оның айтуынша, ансамбль тарихы осыдан 23 жыл бұрын №23 орта мектеп жанындағы дағыстан этномәдени орталығының жексенбілік мектебінде басталған. Осы уақыт ішінде ұжым әуесқой үйірмеден бірнеше буын бишілерді тәрбиелеген танымал би мектебіне айналды.

Ансамбль жетекшілері, хореографтар Алик Мустафаев пен Зейнаб Зиятованың кәсібилігі, табандылығы мен шығармашылық ұстанымы ұжымды үлкен жетістікке жеткізді. Бүгінде мектеп өнерпаздары қала мен облыстағы ірі іс-шаралардың көркін қыздырып қана қоймай, Маңғыстаудан тыс жерлерде де өнер көрсетіп жүр. «Шадвал» мектебіне алдағы уақытта да табыс тілейміз және бір күні оған «халықтық» атақ беріледі деп сенеміз, – деді Юсуп Шахшаев.

Концерт барысында ансамбль жетекшілері, бүгінде тәлімгерлік қызметке араласа бастаған үздік оқушылар және ата-аналар белсенділері марапатталды.

Кеш қонақтарына жиырмаға жуық би нөмірі ұсынылды. Сахнада жұптық лирикалық билерден бастап, бурка киген абректердің қарқынды қойылымдарына дейінгі түрлі композициялар орындалып, көрерменге ерекше әсер сыйлады.

Мектеп жетекшісі Алик Мустафаевтың айтуынша, ұжым 2003 жылы құрылған және бүгінде оның құрамында 28 этнос өкілдері бар. Сондай-ақ мектептің 12 түлегі Қазақстан мен Ресейде өздерінің лезгинка мектептерін ашқан.

Алдымызда жоспар көп. Қазақстан мен Ресейде жалпы саны 33 шеберлік сабағын өткіздім, оның бесеуі Мәскеудегі жетекші мектептерде ұйымдастырылды. Бүгінде Қазақстандағы лезгинка ұжымдарының шамамен 90 пайызы менің әдістемем бойынша жұмыс істейді. Мектепті біз Зейнаб Зиятовамен бірге басқарамыз. Ол – дарынды хореограф әрі режиссер. Сонымен қатар Маңғыстау облысындағы шығармашылық ұжымдардың төрайымы және «Настроение» үлгілі би ансамблінің жетекшісі. Би тілі бәріне түсінікті. Кавказ лезгинкасы этносаралық түсіністікті, тату көршілік қағидаттарын нығайтуға және жастар тәрбиесіне ықпал ете алады. Біз жұмысымызда осы бағытқа ерекше мән береміз, – деді Алик Мустафаев.

Бүгінде «Шадвал» мектебі өңірдегі танымал би ұжымдарының бірі саналады. Ұжым жастар арасында кавказ би мәдениетін дәріптеп, оны сақтауға үлес қосып келеді.