Ақтауда 44 шақырым жылу желісі жаңартылады
Маңғыстау облысының әкімі Нұрдәулет Қилыбай жауаптылармен бірге өңірдің алдағы жылыту маусымына дайындық мәселелерін талқылады, деп хабарлайды otpannews.kz.
Жиында облыстық энергетика және тұрғын үй-коммуналдық шаруашылық басқармасының басшысы Бердібек Қартбаев өңірдегі қысқы маусымға дайындық жұмыстары туралы баяндап, жұмыстың мерзімінен бұрын аяқталу сатысында екенін жеткізді.
– Ақтау қаласында жалпы ұзындығы 566 шақырымды құрайтын жылу желілерінің тозу деңгейі бүгінде 79%-ға жеткен. Оның ұзындығы 47,7 шақырым болса, соның 44 шақырымы кезең-кезеңімен жаңартылып жатыр. 2024 жылы 11,5 шақырым желі жаңартылды, биыл тағы 10 шақырымы ауыстырылып жатыр. Қазіргі таңда жұмыс 90%-ға орындалып, мерзімінен бұрын қыркүйек айында толық аяқталады деп жоспарланып отыр, - деді Бердібек Қартбаев.
Сонымен қатар Ақтаудың 3А, 3Б шағынаудандарында және аурухана қалашығында жалпы ұзындығы 10,2 шақырымды құрайтын ішкі жылу желілерін қайта жаңғырту жұмыстары жалғасып жатыр. Қазіргі уақытта жұмыстардың 91% орындалды. Жоба аяқталғаннан кейін қаладағы жылу жүйесінің тозу деңгейі 75%-ға дейін төмендеп, тұрғындарға жылуды үздіксіз әрі сапалы жеткізу жоспарланып отыр.
Айта кетейік, Маңғыстау атом энергетикалық комбинатында 2025-2026 жылдарға жоспарланған негізгі энергетикалық жабдықтарға күрделі жөндеу жұмыстары жоспарға сай жүріп жатыр. Қазіргі таңда ЖЭС-2 энергоблогының жөндеуі толық аяқталды. ЖЭО-2 нысанындағы №13 қазандық агрегатындағы жұмыстардың орындалуы 42%, №3 турбинадағы жұмыстар 28% құраса, ЖЭО-1 станциясындағы бойлер қондырғыларында жөндеу жұмыстарының орындалу деңгейі 75-80%-ға жетті.
Кеңесте облыс әкімі Нұрдәулет Қилыбай жауапты басқарма басшыларына дайындық жұмыстарын сапалы аяқтап, тұрғындарды алдағы жылыту маусымында жылумен үздіксіз және сапалы қамтамасыз етуді тапсырды.
