Иммигранттардың ҚР келуі мен болуының, сондай-ақ олардың республикадан шығуының қағидаларына, Көші-қон бақылауын жүзеге асыру қағидаларына өзгерістер мен толықтырулар енгізуді көздейтін Үкімет қаулысының жобасы дайындалды, деп хабарлайды otpannews.kz.

Негізгі өзгеріс Қазақстан мен Түркияның визасыз режимін кеңейтуге қатысты. Атап айтқанда, Түркия азаматтары Қазақстанға кіріп, 180 күнтізбелік күннің әрбір кезеңінде 90 күнтізбелік күн (қазіргі уақытта 30 күн) осында бола алады.

- Жобаны қабылдаудағы мақсат – Түркия Республикасымен тығыз ынтымақтастықты дамыту, Қазақстан Республикасында қолайлы инвестициялық және туристік ахуал қалыптастыру, экономикалық дипломатияны жандандыру, - делінген қаулы жобасында.

Құжат 2025 жылдың 28 шілдесіне дейін қоғамдық талқылау үшін Ашық НҚА порталына орналастырылған.