Маңғыстауға шетелдік инвесторлардың қызығушылығы артып келеді
Маңғыстау өңіріне шетелдік инвесторлардың қызығушылығы жылдан-жылға артып келеді. Соның бір мысалы – Қытайдың «Blac stone» мұнай сервис компаниясы. Инвесторлар «Ақтау теңіз порты» арнайы экономикалық аймағында жаңа өндіріс ашуды жоспарлап отыр. Жоба аясында тауарлық мұнайды дайындауға арналған химиялық реагенттер шығаратын зауыт салу көзделген, деп хабарлайды otpannews.kz «Ақтау теңіз порты» АЭА баспасөз қызметіне сілтеме жасап.
Компания делегациясы арнайы экономикалық аймақ өкілдерімен кездесіп, жобаның әлеуетін талқылады. Әзірге бұл – танысу және пікір алмасу деңгейіндегі алғашқы қадам. Егер жоба іске асса, Маңғыстау экономикасына серпін беріп, жергілікті тұрғындар үшін жаңа жұмыс орындарын ашуға мүмкіндік туады.
Айта кетейік, «Ақтау теңіз порты» АЭА аумағында инвесторларға бірқатар жеңілдік қарастырылған. Мұнда тіркелген кәсіпорындар корпоративтік табыс, мүлік, жер салығы мен импорттық қосылған құн салығынан, сондай-ақ кедендік баждардан босатылады. Сонымен қатар жобаларға толық әкімшілік және техникалық қолдау көрсетіледі.
Бүгінде экономикалық аймақта 28 кәсіпорын жұмыс істейді. 2025 жылдың бірінші жартыжылдығында «Ақтау теңіз порты» АЭА аумағына тартылған инвестициялар көлемі 10,2 млрд теңгені құрады. Сол кезеңде өндірілген өнім мен көрсетілген қызмет көлемі – 34,5 млрд теңге, мемлекетке түскен салық – 3,2 млрд теңге, экспорт көлемі – 72 млн теңге болды. Сондай-ақ екі жарым мыңға жуық жаңа жұмыс орны ашылды.
