Маңғыстауда мұнай өндіру «Лукойлға» қарсы санкцияларға қарамастан өсуі мүмкін

Маңғыстау облысындағы кен орындарында мұнай өндіру 2030 жылға қарай 21 млн тоннаға дейін өсуі мүмкін. Бұл барланған кен орындарын игеру есебінен жүзеге асады, деп хабарлайды otpannews.kz сайты forbes.kz-ке сілтеме жасап.

Сарапшылардың айтуынша, қазіргі уақытта Маңғыстау облысы Қазақстанда мұнай өндіру көлемі бойынша екінші орында тұр. 2026 жылдың қаңтар айының қорытындысы бойынша оның үлесі 27,6% болды.

2026 жылдың қаңтарында 1 446 мың тонна мұнай өндірілген. Бұл көрсеткіш алдыңғы аймен салыстырғанда 0,5%-ға аз, ал 2025 жылдың қаңтарымен салыстырғанда 0,7%-ға көп.

«2030 жылға қарай өңірдегі мұнай өндіру көлемі шамамен 17 млн тоннадан 21 млн тоннаға дейін өсуі мүмкін. Бұл “Қаламқас-теңіз”, “Хазар” және “Әуезов” кен орындарын игеру есебінен болады. Олардың қорлары барланып, мемлекеттік балансқа қойылған», - деп жазады Naft арнасы.

Сарапшылардың пікірінше, «Маңғыстаумұнайгаз» АҚ, «Өзенмұнайгаз» АҚ, «Қаражанбасмұнай» АҚ облыстағы үздік мұнай өндіруші компания. Каспий теңізінің қазақстандық секторындағы «Қаламқас-теңіз», «Хазар» және «Әуезов» кен орындарын «Kalamkas-Khazar Operating» ЖШС игеріп жатыр. Бұл компанияның 50% акциясы «Лукойлға» тиесілі.

2023 жылғы 9 ақпанда «ҚазМұнайГаз» бен «Лукойл» «Қаламқас-теңіз, Хазар, Әуезов» жер қойнауын игеру жобасы бойынша бірқатар келісімдерге қол қойды.

2023 жылдың қыркүйегінде «Лукойл» ҚМГ-нің стратегиялық серіктесіне айналды.

Алайда 2025 жылдың қазанында Ұлыбритания мен АҚШ «Лукойлды» санкциялық тізімдеріне енгізді. Соның салдарынан «Қаламқас-теңіз, Хазар, Әуезов» жобасын іске асыруға қауіп төнді.

2025 жылғы 25 қарашада «Самұрық-Қазына» қорының басқарма төрағасы Нұрлан Жақыпов (қор – «ҚазМұнайГаздың» негізгі акционері) АҚШ енгізген санкциялардың салдарын азайту үшін жұмыс жүргізіліп жатқанын мәлімдеді.

Ал 4 желтоқсанда ҚМГ мәліметінше, бірлескен жобаға қатысушылар сыртқы факторлардың, соның ішінде ПАО «Лукойлға» қарсы санкциялық шектеулердің ықтимал әсеріне кешенді бағалау жүргізген.