Маңғыстауда бірнеше судья қызметінен босатылды
АҚТАУ. OTPANNEWS.KZ – Мемлекет басшысы Қасым-Жомарт Тоқаевтың Жарлығымен Маңғыстау облысының соттарында бірқатар өзгеріс болды.
Президент тиісті Жарлыққа 1 қазанда қол қойған.
Жарлыққа сәйкес, Ақтау қаласының №2 сотының судьясы Марал Сейітова қызметінен босатылып, Астана қаласының азаматтық істер жөніндегі ауданаралық сотының судьясы болып тағайындалды.
Сондай-ақ Маңғыстау облысының бірқатар судьясы қызметінен босатылды.
Атап айтқанда, Маңғыстау облыстық қылмыстық істер жөніндегі мамандандырылған ауданаралық сотының төрағасы Серікқали Бердібеков басқа жұмысқа ауысуына байланысты қызметінен босатылды.
Сондай-ақ Ақтау қаласының №2 сотының судьясы Тұрар Алданов өз қалауы бойынша қызметінен босатылды.
Мұнайлы аудандық сотының судьясы Қанат Нұрғабылұлы да басқа жұмысқа ауысуына байланысты қызметінен босатылды.
