Еліміздің батыс өңіріндегі алғашқы ПЭТ/КТ орталығы Ақтауда ашылды

Ақтауда алғашқы позитронды-эмиссиялық томография (ПЭТ/КТ) орталық ашылды, деп хабарлайды otpannews.kz.

Аталған медициналық орталық еліміздің батыс өңірінде алғаш рет жұмысын бастап отыр. Орталық онкологиялық ауруларды жоғары технологиялық диагностикалауға қолжетімділікті арттыруға бағытталған.

Ақтаудағы орталыққа инвесторлар 1,3 млрд теңге қаржы салды. Сонымен бірге мемлекетпен жасалған келісім аясындағы жалпы инвестиция көлемі 37,9 млрд теңгені құраған. 25 жаңа жұмыс орнын ашқан орталықтың жылдық жобалық қуаты 3 000 адамды зерттеуге қауқарлы.

Маңғыстау облыстық онкологиялық диспансері ғимаратында орналасқан орталықтың ашылу салтанатына облыс әкімі Нұрдәулет Қилыбай, Түркия республикасының Ақтаудағы бас консулы, Orhun Medical компаниясының өкілдері қатысты.

Жаңа орталықтың ашылуы – науқастардың үйге жақын жерден заманауи әрі дәл диагностикадан өтуіне мүмкіндік беріп, жолға кететін уақыт пен шығынды едәуір азайтады. Бұл туралы облыс әкімі Нұрдәулет Қилыбай ашылу салтанатында атап өтті.

«Мемлекет басшысы жаңа технологияларды қолдана отырып, денсаулық сақтау саласын жақсарту туралы үнемі айтады. Сондықтан Orhun Medical компаниясының өкілдерімен кездесіп, Маңғыстауда орталық ашу туралы мәселені қозғаған болатынбыз. Сол уақытта уәде беріліп, арада бір жыл өткенде инвестордың қаржысына орнатылды. Бұл онкологияның бастапқы уақытын анықтайтын құрылғы. Бұған дейін маңғыстаулықтар осындай аппаратқа түсу үшін ай бұрын Астана мен Алматыға жазылатын. Өкінішке қарай, бұл дерт тез асқынып кетеді. Екіншіден, Үкімет тек емге қажетті қаражатты төлеп, науқас жол шығыны мен басқа да қажеттіліктерге қыруар ақша жұмсайды. Енді жылына 3 мың адамды қарауға есептелген орталық еліміздің батыс өңірінде – біздің облыста ашылып отыр. Осы тұста Үкімет пен денсаулық сақтау министрлігіне алғыс айтамын. Мұндай аппарат Алматы секілді орталықтарда да жоқ. Сондықтан Ақтауға мұндай құрылғы ел бойынша алғаш болып осы орталыққа жеткізіліп отыр», - деді облыс әкімі.

Маңғыстау облыстық онкологиялық диспансері директорының орынбасары Нұрлан Балтабеков жалпы еліміз бойынша онкологияны емдеу бойынша Маңғыстау облысында көрсеткіштің жоғары екенін жеткізді.

«Биыл ПЭТ/КТ Ақтауға әкелініп, үлкен жаңалық болып отыр. Бұл аппарат ем алған кезде, емдеу процесі дұрыс па, әлде кері әсер етіп жатыр ма, соны анықтайды. Жаңа аппарат жасанды интелектпен жұмыс істейді. Хирургтар операция алдында ПЭТ/КТ-дан өткізсе, нақты қандай метостаздарды алып тастау керек, операцияның көлемі, химиотерапияның пайдасы, сәулемен ем бергенде қай жерде өзгеріс барын анықтайды. ПЭТ/КТ болса, онкологияны емдеуде сапа жақсы болады. Маңғыстау облысында онкологияны емдеу жақсы жолға қойылған. Мен мұны шетелде, Алматыда қызмет атқарған маман ретінде сенімді түрде айта аламын», - деді Нұрлан Балтабеков.

Бұған дейін Маңғыстау және көршілес облыстардың тұрғындары ПЭТ/КТ зерттеулерінен өту үшін Астанаға немесе Алматыға баруға мәжбүр болатын. Ақтау тұрғыны Әзімбек Қаналиев енді тексерілу үшін Алматыға бармайтынын атап, өңірде қаралуға оң мүмкіндік туғанын жеткізді.

«Ақтауда 1990 жылдан бері тұрамын. Маңғыстау облысының халқы үшін бұл орталық өте тиімді болғалы отыр. Енді облыс орталығында кең ауқымда тексерілуге мол мүмкіндік бар. Дәрігерлер бізді жылы шыраймен қарсы алып, тексеріп жатыр. Өңірдің медицина саласы ілгері қарай дами берсін деген тілектемін. Осыған үлес қосып жатқан барша жанға шын жүректен алғыс айтамын. Өңірде орталық ашылған соң жазылып, көп күтпей аппаратқа түстім. Тамыз айының басында арнайы мамандар тексеріп, диагнозым жақсы нәтижені көрсетті», - деді қала тұрғыны Әзімбек Қаналиев.

Қазіргі уақытта аталған орталықта пациенттерді қабылдау басталды. Сондай-ақ, Алматыдан радиофармацевтикалық препараттардың тұрақты жеткізіп отыру жұмыстары да жолға қойылды. Бұл жоба энергетика министрлігінің ядролық физика институтымен, Air Astana әуекомпаниясымен және Маңғыстау облысы әкімдігінің қолдауымен жүзеге асты.

2015 жылы Алматы қаласында құрылған Orhun Medical – Қазақстандағы жетекші жеке медициналық компаниялардың бірі саналады. Бүгінде компанияның желісі 7 қалада орналасқан 16 медициналық орталықты біріктіреді. Жыл сайын 1,5 миллионнан астам пациентке қызмет көрсетеді және радиология, онкология, амбулаториялық көмек пен зертханалық зерттеулер саласында қызмет ұсынып келеді.