Жаңаөзенде ата-аналар әскери бөлімнің тыныс-тіршілігімен танысты
Жаңаөзенде Ұлттық ұланның 5548 әскери бөлімінде «Әскер аналардың көзімен» атты ашық есік күні өтті. Жас сарбаздардың ата-аналары әскери бөлімнің тыныс-тіршілігімен танысып, ұлдарының күнделікті қызметін өз көздерімен көрді. Бұл туралы ҚР Ұлттық ұланы «Батыс» өңірлік қолбасшылығының баспасөз қызметі хабарлады.
Әскерге келгеніне бір ай болған жас сарбаздар ата-аналарына әскери өмірдің алғашқы кезеңіндегі күн тәртібін, тәртіп пен жауапкершілікке негізделген қызмет барысын таныстырды. Қонақтар әскери киім үлгілері мен қару-жарақ түрлерін көріп, казарманы және медициналық пунктті аралады. Сондай-ақ сарбаздардың тамақтану жағдайымен танысып, асханадағы жұмыс барысын бақылады.
Ашық есік күнінің ең әсерлі сәттерінің бірі – ата-аналардың ұлдарымен жүздесуі болды. Күнделікті сағынышын басып, балаларының әскери ортаға бейімделуін өз көздерімен көрген ата-аналар үшін бұл кездесу ерекше маңызға ие болды.
5548 әскери бөлімінің командирі, подполковник Хамит Бигужин әскери бөлімдегі тәртіп, сарбаздарға берілетін тәлім-тәрбие және әскери қызметтің ерекшеліктері жөнінде кеңінен баяндады. Сонымен қатар, әрбір әскери қызметшінің қауіпсіздігі мен амандығы бөлім басшылығының басты назарында екенін атап өтті.
