Жаңаөзенде 2000-ға жуық тұрғын жалпықалалық экологиялық акцияға қатысты
Жаңаөзенде «Таза Қазақстан» акциясы аясында және ҚР Конституциясының 30 жылдығына орай кең көлемді экологиялық шара ұйымдастырылды. Қала тазалығын сақтауға бағытталған акцияға 2000-ға жуық тұрғын қатысты, деп хабарлайды otpannews.kz қала әкімдігінің баспасөз қызметіне сілтеме жасап.
Экоакция орталық алаңнан басталып, қатысушыларды Жаңаөзен қаласының әкімі Жансейіт Қайнарбаев құттықтап, қала экологиясына үлес қосуға шақырды. Әкім тұрғындармен бірге тазалық жұмыстарына қатысып, үлгі көрсетті. Шараға Маңғыстау облыстық экология департаментінің басшысы Армат Жүсіпқалиев, «Zangar Event» қоғамдық қорының басшысы Нұржан Мұхаммедов және елімізге танымал эко-блогер Дулат Набиев те арнайы келіп, қала тұрғындарымен бірге еңбек етті. Олар экологиялық мәдениетті дамыту мен тұрмыстық қалдықтарды дұрыс сұрыптау мәселелеріне тоқталды.
Акцияға қаладағы өндірістік кәсіпорындар, мемлекеттік және коммуналдық мекемелер, ауылдар, мектептер мен балабақшалар, денсаулық сақтау ұйымдары, жастар ұйымдары мен еріктілер түгелге жуық атсалысты. Белгіленген аумақтарда қоқыс жинау, санитарлық тазалау және көгалдандыру жұмыстары жүргізілді.
Шарада 40-қа жуық арнайы техника жұмылдырылып, 300 тоннаға жуық қоқыс шығарылды. Ұйымдастырушылардың айтуынша, бұл ауқымды акция Жаңаөзен тұрғындарының бірлігін көрсетіп қана қоймай, қаланың экологиялық дамуына серпін берді.
