Ақтауда 16 шағынауданда жол құрылысы басталды
Ақтау қаласының 16 шағынауданында инженерлік желілері толықтай жаңартылған аумақтарда жол құрылысы басталды, деп хабарлайды otpannews.kz.
Ақтау қаласы әкімдігінің хабарлауынша, жалпы ұзындығы 3 шақырым 800 метрді құрайтын жол құрылысының алғашқы кезеңінде 600 метрлік бөлікке асфальт төселіп, сапалы жол негізі қаланды. Қалған учаскелердегі жұмыс алдағы уақытта жүзеге асады.
Құрылыс жұмыстарына мердігер мекеме – «Альянс ЛТД» ЖШС жауапты. Құрылыс алаңында 13 арнайы техника мен 30 жұмысшы бар.
- Құрылыс жұмыстары биыл қазан-қараша айларында толық аяқталады деп жоспарланды. Жобаның орындалуы қала әкімінің жіті бақылауында, - деді Ақтау қалалық құрылыс бөлімінің басшысы Еркінбек Жауқан.
Айта кетейік, бұған дейін 16 шағынауданда инженерлік инфрақұрылымды жаңғырту бойынша ауқымды жұмыс атқарылды. Атап айтқанда, 10 жаңа трансформаторлық станция орнатылып, 6 500 метр су құбыры, 4 500 метрге жуық кәріз жүйесі мен 2 000 метрден асатын жылу құбыры жүргізілді.
