Бакуде «Қарабақ» жанкүйерлері «Қайрат - Алматы» деп ұрандатты
Әзірбайжанның «Қарабақ» футбол клубының жанкүйерлері “Ференцварошпен” матч алдында алматылық “Қайрат” клубының атын айтып, ұрандады, деп хабарлайды otpannews.kz.
Бакуде “Қарабақ” клубы футболдан Чемпиондар лигасының іріктеу кезеңінде Венгрияның “Ференцварош” командасын қабылдап, 2:3 есебімен есе жібергеніне қарамастан жалпы есепте голдар саны бойынша (5:4) топтық кезеңге жолдама алды.
Жергілікті жанкүйерлердің “Қайрат - Алматы” деп ұрандаған сәтіндегі бейнежазбасы желіде кеңінен тарап, қазақ футбол жанкүйерлерінің ыстық ықыласына бөленді.
Осыдан екі күн бұрын “Қайрат” өз алаңында Шотландияның “Селтик” клубынан пенальти сериясында басым түсті (3:2). Алматыдағы матчта қақпашы Темірлан Анарбеков “Селтик” ойыншылары тепкен 3 соққыға тосқауыл болып, командасын Чемпиондар лигасының топтық кезеңіне шығуына септігін тигізген болатын.
