Ақтауда Конституция күніне орай шекарашылар арасында зияткерлік ойын өтті

Ақтауда Қазақстан Республикасының Конституциясы күні мен Ата заңның 30 жылдығына орай ҰҚК шекара қызметі Маңғыстау облысы бойынша департаментінің әскери қызметшілері «Ата заң – азаматтық қоғам негізі» атты зияткерлік ойында бақ сынады, деп хабарлайды otpannews.kz.

Қоғамдық коммуникация орталығының мәліметінше, шараны Ақтау қалалық орталық кітапханасы мен оның №9 филиалы ұйымдастырды. Қазылар алқасының құрамында әскери прокуратураның Ақтау гарнизоны бойынша прокуроры, әділет майоры Берік Әбітов және ҰҚК әскери полициясының Ақтау гарнизоны бойынша жедел уәкілі, майор Бауыржан Кантеміров болды.

Зияткерлік сайысқа жағалау күзетінің бірінші дивизионы мен Қарақия аудандық шекара басқармасынан 20 сарбаз бен матрос қатысты. Қатысушылар «Атқыш», «Сарбаз» және «Сардар» атты командаларға бөлініп, бірнеше кезеңнен тұратын тапсырмаларды орындап, өз білімін, логикалық ойлау қабілетін және шығармашылық мүмкіндіктерін көрсетті.

Шекарашылар мақал-мәтелдерді шешіп, заңнама бойынша сұрақтарға жауап беріп, патриоттық әндер айтып, күрделі логикалық тапсырмаларды орындады. Әр тапсырмада белсенділік танытып, жоғары ұпай жинауға ұмтылды.

Тартысты өткен жарыстың қорытындысы бойынша бірінші орынды «Атқыш» командасы иеленді. Екінші орын «Бүркіт» командасына берілсе, үшінші орынды «Сарбаз» және «Сардар» командалары бөлісті.

Іс-шара аясында Конституциялық құқық, тәуелсіздік тарихы және Отан тақырыбындағы кітап көрмесі де ұйымдастырылды. Шекарашылар ұсынылған әдебиеттермен танысып, пікір алмасты.

«Мен еліміздің тарихы мен заңдары туралы көп нәрсе білдім. Бұл ойын өте қызықты әрі тартымды өтті. Осындай керемет байқау ұйымдастырғандарыңызға үлкен рахмет», – деді аға матрос Хан Баймағамбетов.

Шара соңында жеңімпаздар диплом және мақтау қағазымен марапатталды.