Маңғыстауда Конституция күніне орай «Рухты сарбаз» байқауы өтті

Қазақстан Республикасының Конституциясы күніне орай Маңғыстау облысында «Рухты сарбаз» атты облыстық байқау ұйымдастырылды, деп хабарлайды otpannews.kz.

Байқаудың негізгі мақсаты – жастарға патриоттық тәрбие беру, сарбаздардың әскери дайындық деңгейін бағалау, әскери өмірге деген оң көзқарас қалыптастыру және жауынгерлік өнерді дәріптеу.

Сайыс үш бағыт бойынша ұйымдастырылды:

• «Сарбаздың бір күні» – әскери даярлық, төзімділік пен жауынгерлік машықты бейнеролик арқылы көрсету;

• «Өнерлі сарбаз» – ән айту, күй тарту, би билеу немесе өлең оқу арқылы өнер көрсету;

• «Әскердегі сарбаздың хаты» – жақындарына арнаған мазмұнды хат жазу.

Байқауға өңірдегі әскери бөлімдердің сарбаздары қатысып, өз өнері мен шеберлігін ортаға салды. Қазылар алқасы қатарында облыстық Қазақстан халқы Ассамблеясының Аналар кеңесі мен Ардагерлер кеңесінің мүшелері, этномәдени бірлестік төрағалары, саяси партия өкілдері және әскери қызметкерлер болды.

Жарыс барысында қатысушылардың белсенділігі жоғары болып, сайыс рухани көтеріңкі көңіл күйде өтті. Байқау қорытындысы бойынша үздіктер «Рухты сарбаз», «Әскер тарланы» арнайы номинацияларымен, сондай-ақ І, ІІ, ІІІ дәрежелі дипломдармен, алғыс хаттармен және бағалы сыйлықтармен марапатталды.

Байқауға қатысушы 51809 әскери бөлімінің мерзімді әскери қызметшісі Райымбек Жалғасұлы шарадан алған әсерін бөлісті.

– Бүгін «Рухты сарбаз» байқауына әскери бөлімшемнің атынан қатысып отырмын. Бұл іс-шара сарбаздардың рухын көтеріп, бір-біріне қолдау көрсетуге және Отанға адал қызмет етуді насихаттауға бағытталған деп ойлаймын. Жарыстың атмосферасы өте керемет. Әр кезеңнің өзіндік ерекшелігі бар, қобалжу да болды. Өзім осындай шараларға белсене қатысқанды ұнатамын, – деді ол.