Сала мамандарын даярлайтын бірегей оқу орны: Х.Өзбекқалиев атындағы колледждің мүмкіндігі қандай?
Биыл еліміз бойынша жарияланған жұмысшы мамандықтар жылы аясында Ақтаудағы Халел Өзбекқалиев атындағы Маңғыстау жоғары политехникалық колледжі кешенді жұмыстарға ден қойып, бірқатар ауқымды іс-шараларды өткізді, деп хабарлайды otpannews.kz.
Маңғыстаудағы ең беделді оқу ордасының бірі саналатын білім ошағы республика бойынша үздік 10 базалық колледждің қатарына енген. Директор Зарипа Шолтанованың айтуынша, 25 мамандық бойынша заманауи білім беретін оқу ғимаратында 40 оқу кабинеті, 10 зертхана және 10 арнайы жабдықталған шеберхана студенттерге болашақ мамандығын меңгеруге қолайлы жағдай жасап отыр.
Облыс бойынша аса қажетті салалық мамандарды әзірлейтін Халел Өзбекқалиев атындағы Маңғыстау жоғары политехникалық колледжі аймақ бойынша салалық халықаралық аккредитациядан өткен алғашқы оқу орны болып саналады. Сондай-ақ, Қазақстанда тұңғыш рет «Дәнекерлеу ісі» мамандығы бойынша NCCER стандарттарымен халықаралық аккредитация алғанын ерекше атауға болады.
«Халел Өзбекқалиев атындағы Маңғыстау жоғары политехникалық колледжінде 1500-ге жуық студент білім алып жатыр. 2022 жылы жоғары колледж мәртебесін иеленді. «Жұмысшы мамандықтар жылы» деп жариялануына байланысты колледжде көптеген кешенді іс-шара өткізіліп жатыр. Биыл «Dosti Skills Aktau-2025» халықаралық салалық достық чемпионатын өткіздік. Бұл сында шетелдерден 30-ға жуық қатысушы сынға түсті. Біздің студенттер олармен бірге бір алаңда сайысып, екі шәкіртіміз Алматы қаласындағы Еуразия технология университеті ректорының арнайы грантын иеленді. Қазіргі уақытта екі түлегіміз өз мамандығы бойынша колледжге жұмысқа қабылданды. Жыл сайын үздік түлектерді жұмысқа қалдыру дәстүрге айналып келеді. Өз мамандықтары бойынша кәсіпорындарда жұмысқа орналасып жатқан түлектеріміз көп екенін мақтанышпен айта аламыз», - деді Зарипа Шолтанова.
Колледжде мамандарды ұлттық және халықаралық стандарттарға сай даярлаумен қатар, оқу орнының базасында IT-бағытты дамытуға арналған IT-Hub жұмыс істеп тұр. Бұдан бөлек, оқу үрдісінде BOPPS, CLIL, АКТ, интерактивті оқыту әдістері қолданылатыны айтылды.
Басты ерекшелік – колледж өңірдегі «Төтенше жағдайда қорғану» мамандығы бойынша кадр даярлайтын жалғыз оқу орны. Сол үшін «Төтенше жағдайда қорғау» мамандығына арналған екі жүгіру жолағы бар оқу мұнарасы республика бойынша екінші болып орнатылғанын баспасөз туры барысында директор Зарипа Есенбайқызы ерекше атап өтті.
Ғимарат базасындағы өндірістік шеберханада үшінші курс студенті Нұртас Оразғалиевті ұшырастырдық. Әңгіме барысында болашақ дәнекерлеуші бұл мамандықты ағаларына еліктеп таңдағанын айтты.
«Дәнекерлеуші мамандығын таңдағаным - ағаларым осы саланың майталмандары. Солардың ізін жалғағым келді. Колледжде ұстаздардан дәнекерлеудің қыр-сырын меңгеріп, шебер болып шығуды көздеймін. Алда кәсіби салада табысты болғым келеді. Сабақта, практикада терең меңгеріп білім алудамыз», - деді Нұртас Оразғалиев.
Халел Өзбекқалиев атындағы Маңғыстау жоғары политехникалық колледжінде ағаш шеберлері де даярланады. Бүгінде студенттерге білгенін үйретіп жүрген Айдын Айдарханұлы өндірістен оқу орнына арнайы шақыртумен келгенін ерекше атады.
«Сандық бағларламамен студенттерге ДСП-ларды тілуді үйретеміз. Өзім бұған дейін өндірісте жұмыс істегенмін. Бес жылдан бері студенттерге практикалық сабақ беремін. Іштегі жиһаздардың барлығы студенттерін жасап жатыр», - деді ағаш шебері Айдын Шарапиев.
Жыл сайын облыс орталығындағы жоғары политехникалық колледждің студенттері ірі кәсіпорындарында практикадан өтіп жүр. Олардың қатарында «ҚазАзот» АҚ, «Ақтау машина жасау зауыты» ЖШС, «КазТрансОйл» АҚ, «Каскор-Машзавод» АҚ, «Oil Services Company» ЖШС, «Ақтау трасформатор зауыты» ЖШС «Маңғыстау-Имстальком» ЖШС «Маңғыстау атом энергетика комбинаты» ЖШС, «ADVER» ЖШС, МО «Төтенше жағдайлар департаменті», «DCG Aktau» ЖШС, «Mediana Services Limited», «A2 DESIGN» ЖШС, «Каспий су тұщыту зауыты» ЖШС секілді іргелі кәсіпорындарда шеберліктерін шыңдап, болашақ бағытын анықтайды. Тіпті олардың арасында көзге түскен түлектер жұмысқа шақырту алған сәттер де аз емес.
Х.Өзбекғалиев атындағы Маңғыстау жоғары политехникалық колледжі 1972 жылы ашылған. 2022 жылы «Жоғары колледж» мәртебесін алған соң мұнда қолданбалы бакалавр ұғымы енгізіліп отыр.
«Бүгінде колледж заманауи техникалық және инженерлік бағыттар бойынша кадр даярлайды. Дуальді оқыту, модульдік бағдарламалар, инклюзивті білім беру сияқты инновациялық тәсілдерді тәжірибеге енгізіп, «Жас маман» және WorldSkills жобаларына белсенді қатысады. Сондай-ақ колледж халықаралық стандарттарға сәйкес өз моделін қалыптастырып, еңбек нарығына лайық мамандар дайындап жатырмыз», - деді колледж директоры Зарипа Шолтанова.
