Қазақстан Қарулы Күштерінде тыл мамандары күні аталып өтті
28 тамыз күні Қазақстан Республикасының Қарулы Күштерінде кәсіби мереке – тыл мамандары күні аталып өтті, деп хабарлайды otpannews.kz Қорғаныс министрлігінің баспасөз қызметіне сілтеме жасап.
Бұл күн – армияның жауынгерлік қабілетін материалдық-техникалық қамтамасыз ету арқылы нығайтып жүрген барлық мамандар үшін ерекше мәнге ие.
Әскери-теңіз базасында матростарға арнап күн сайын 7-8 жиынтық әскери киім тігілетін тігін цехы жұмыс істейді. Мұндағы мамандардың еңбегі жеке құрамды барлық стандарттар мен талаптарға сай, сонымен қатар әскери қызметшілердің жеке өлшемдеріне сәйкес келетін киім-кешекпен қамтамасыз етуге мүмкіндік беріп отыр.
2025 жылы Қазақстан Қарулы Күштеріндегі ең үздік заттай мүлік қоймаларының бірі ретінде 29011 әскери бөлімінің қоймасы танылды. Мұнда материалдық құралдарды қабылдау, сақтау және беру қатаң ережелерге сай жүзеге асырылады. Дәлдігі мен жауапкершілігі жоғары жұмыс жүйесі бұл қойманы өзге бөлімшелер үшін үлгіге айналдырды.
– Тылдық қамтамасыз ету жүйесінде ерекше рөлді Әскери-теңіз базасына қызмет көрсететін жанар-жағармай материалдары қоймасы атқарады. Бұл жерде жанармай сапасына – тазалық, тұтқырлық, тығыздық және қату температурасына қатаң талап қойылады. Кемелер мен катерлердің, сондай-ақ жерүсті техникасының сенімді жұмысы тікелей осы жанармай сапасына байланысты, – деді 29011 әскери бөлімінің тылдық қамтамасыз ету жөніндегі орынбасары, подполковник Нұржан Жүсіпов.
Сондай-ақ тыл бөлімшелері әскерді азық-түлікпен қамтамасыз ету бағытында әскери медицина қызметкерлерімен тығыз байланыста жұмыс істейді. Әр күн сайын тағам өнімдерінің сапасы мен қауіпсіздігі бақылауда ұсталып, жеке құрам теңгерімді әрі толыққанды ас мәзірімен қамтылуда.
