Маңғыстауда Конституция күніне орай 60-қа жуық іс-шара өтеді
Маңғыстау облысында Қазақстан Республикасы Конституциясының 30 жылдығына арналған мерекелік іс-шаралар ұйымдастырылуда. Бұл туралы қоғамдық коммуникация орталығында өткен брифингте өңірлік ақпарат қоғамдық даму басқармасының бөлім басшысы Інжу Тұрарова мәлімдеді, деп хабарлайды otpannews.kz.
Оның айтуынша, мерекелік бағдарлама аясында облыс көлемінде 60-қа жуық мәдени, спорттық және ағартушылық іс-шаралар жоспарланған.
Атап айтқанда, Әбіш Кекілбайұлы атындағы облыстық тарихи-өлкетану музейінде «Ата заңым – тірегім» атты мерекелік шара, «Азат елдің ар-намысы – Ата Заң» тақырыбында дәрістер, мемлекеттік қызметшілер арасында тақырыптық интеллектуалды QUIZ ойындар ұйымдастырылады. 30 тамыз күні Ақтау қалалық сотында жастарға арналған «Ашық есік күні» өтеді. Маңғыстау ауданында жасөспірімдер арасында қазақша күрестен жарыс ұйымдастырылса, Жаңаөзен қаласы мен аудандарда ақпараттық-ағартушылық науқандар мен семинарлар өткізу жоспарланып отыр. Ақтау қаласында «Амфитеатр» алаңында жергілікті шығармашылық ұжымдардың қатысуымен мерекелік концерт өтеді.
Сонымен қатар қыркүйек айынан бастап мектептер мен колледждерде ашық сабақтар, сынып сағаттары, конституциялық оқулар ұйымдастырылып, құқықтық мәдениетті арттыруға бағытталған іс-шаралар жалғасады.
Жалпы жыл басынан бері облыс көлемінде Конституцияның 30 жылдығына орай 100-ге жуық іс-шара өткізілген. Оның ішінде құқық қорғау органдарымен бірлескен дөңгелек үстелдер, кездесулер, ағартушылық науқандар мен мәдени-бұқаралық шаралар бар. Барлық іс-шара Конституция құндылықтарын дәріптеуге, құқықтық сананы арттыруға және заң үстемдігін нығайтуға бағытталған.
