38 мың жастың талпынысына тірек: «Тәлімгер» білім мен бизнес серіктестігін кеңейтті

Тимур Құлыбаевтың Halyk қайырымдылық қорының «Тәлімгер» жобасы Маңғыстауда 38 мыңнан аса оқушы мен студентті қамтып, жастардың кәсіби және кәсіпкерлік дағдыларын дамытуға серпін берді. Енді осы жұмыстың аясын кеңейту мақсатында «Тәлімгер» өңірлік әдіснамалық орталығы мен Маңғыстау облысының кәсіпкерлер палатасы ынтымақтастық туралы келісімге қол қойды.

Кәсіпке бастайтын жол қабілетті танудан, ізденуден және алғашқы қадамға сенім артудан басталады. «Тәлімгер» жастарға осы жолда бағыт көрсетіп, білімін тәжірибемен ұштастыруға, идеясын нақты жобаға айналдыруға қолдау көрсетіп келеді.

2025 жылғы қыркүйектен 2026 жылғы қыркүйекке дейін жоба өңірдегі 105 мектеп пен 25 колледждің 38 мыңнан астам оқушысы мен студентін қамтып, 865 іс-шара өткізді.

Білімнен – бастамаға, идеядан – іске

Кәсіпкерлік дағдыларды дамытуға арналған 114 іс-шарада оқушылар мен студенттердің 153 жобасы ұсынылды. Сондай-ақ, 230 педагог кәсіпкерлік пен кәсіби бағдар беру, тағы 60 педагог жасанды интеллектіні қолдану бойынша білімін жетілдірді.

«Біздің өңірде талапты, тың ойға бай жастар көп. Сол талаптың қанат жаюына мүмкіндік беруіміз керек. «Тәлімгер» арқылы жастардың өз қабілетін танып, болашағын саналы жоспарлауына қолдау көрсетіп келеміз. Енді кәсіпкерлермен серіктестік олардың идеясын нақты тәжірибемен шыңдауға жол ашады. Бүгінгі ізденімпаз оқушы мен студенттің ертең туған өлкесінде кәсібін дамытып, елге қызмет ететін азамат болғанын қалаймыз», – деді «Тәлімгер» жобасының директоры.

Кәсіпкер тәжірибесі – жас талапқа бағыт

Кәсіпкерлер палатасымен жасалған келісім осы жұмысты жаңа кезеңге шығарады. Жастар кәсіпкерлік негіздерін үйренумен қатар, нақты бизнес өкілдерімен тікелей байланысып, олардың тәжірибесіне сүйене алады.

Ынтымақтастық аясында кәсіпкерлер мен жұмыс берушілерді білім беру бастамаларына, тәлімгерлікке және жастар жобаларын практикалық қолдауға тарту көзделген. Олар оқушылар мен студенттерге идеяларының өміршеңдігін бағалауға, нарық сұранысын зерттеуге, бизнес-модель әзірлеуге және бастамаларын жүзеге асыру жолдарын табуға көмектеседі.

«Өңір экономикасына бастама көтере алатын, нарықтың сұранысын түсінетін, жаңа технологияларды меңгерген жас мамандар қажет. «Тәлімгермен» серіктестік кәсіпкерлердің тәжірибесін жастардың ізденісімен ұштастыруға жол ашады. Жастар жергілікті бизнестің жұмысын жақыннан танып, өз идеясын нақты міндеттерді шешу арқылы дамыта алады», – деді Маңғыстау облысы кәсіпкерлер палатасының өкілі.

Серіктестік жастарға еңбек нарығының сұранысына сай мамандық таңдауға, цифрлық технологиялар мен жасанды интеллектіні меңгеруге көмектеседі. Тараптар кәсіпкерлерді тәлімгерлікке тартып, келешегі бар оқушы және студенттік жобаларға қолдау көрсету жолдарын айқындайды. Басты мақсат – жастардың білімі мен идеясын нақты іске ұластырып, туған өңірінде дамуына мүмкіндік беру.

Айта кетейік, Тимур Құлыбаевтың Halyk қоры бұған дейін де кәсіпкерлік білім беру саласында елеулі жұмыстар атқарды. Кейінгі жылдары серіктестерімен бірге 4000-нан аса мектепте кәсіпкерлік негіздері пәнін енгізіп, 130 мыңнан аса мектеп оқушысы мен 136 мың студентті қамтыды. 5,2 мыңнан аса мұғалім арнайы оқыту курсынан өтті. Енді бұл тәжірибе Маңғыстау облысында жүйелі әрі ауқымды түрде жалғасып, тұрақты нәтижеге қол жеткізу көзделіп отыр.