Мұнайлыда «Таза Қазақстан – жарқын болашақ кепілі» атты экологиялық іс-шара өтті
Мұнайлы ауданының Басқұдық ауылындағы №17 жалпы білім беретін мектеп аумағында «Таза Қазақстан – жарқын болашақ кепілі» атты түлектердің ағаш отырғызу акциясы өтті, деп хабарлайды otpannews.kz сайты Қоғамдық коммуникация орталығына сілтеме жасап.
Іс-шараға аудан әкімі Қанат Құлжанов, аудандық мәслихат төрағасы, ардагерлер кеңесінің және қоғамдық кеңестің төрағалары, бөлім басшылары, сондай-ақ мектеп әкімшілігі, ұстаздар, алғашқы түлектер мен ата-аналар қатысты.
Жиын барысында аудан әкімі сөз сөйлеп, Мемлекет басшысы Қасым-Жомарт Тоқаев бастамашы болған «Таза Қазақстан» акциясының маңыздылығына тоқталды.
Мұнайлы аудандық №17 жалпы білім беретін мектеп директоры Қансұлу Нұрбаева да аталған бастаманың тәрбиелік мәніне ерекше назар аударды.
-Іс-шараның басты мақсаты – жастардың экологиялық мәдениетін қалыптастыру, табиғатқа жанашырлықпен қарауға баулу және ел болашағына деген жауапкершілікті арттыру. Акция аясында түлектер мен қонақтар бірлесіп ағаш отырғызып, қоршаған ортаны көгалдандыруға өз үлестерін қосты,- деді Қансұлу Нұрбаева.
Сонымен қатар алғашқы түлектердің қатысуымен болашақ ұрпаққа арналған хат жазылды. Хат арнайы уақыт капсуласына салынып, мектеп аумағына көмілді.
