«Халықтық құрылыс»: Ақтауда құрылыс және жол салаларындағы мәселелер талқыланды

OTPANNEWS.KZ. - Ақтау қаласында «Заң мен тәртіп» қағидаты мен «Адал азамат» құндылықтарын ілгерілету аясында қала әкімдігі мен Маңғыстау облысы бойынша Экономикалық тергеп-тексеру департаментінің бірлесуімен «Қала құрылысы және жол саласындағы өзекті мәселелер: заңдылық, ашықтық, құқықтық жауапкершілік» тақырыбында кеңес өтті.

Кеңес Мемлекет басшысы Қасым-Жомарт Тоқаевтың 2026 жылғы 28 қазандағы «Қазақстанның жаңа тарихи кезеңдегі өзекті міндеттері» атты Қазақстан халқына Жолдауында белгіленген міндеттерді іске асыру аясында ұйымдастырылды. Президент ұсынған «Халықтық құрылыс» бастамасы инфрақұрылымды ауқымды дамытуға бағытталған және құрылыс сапасын, жұмыс мерзімдерінің сақталуын әрі мемлекеттік қаражаттың тиімді пайдаланылуын қатаң бақылауды талап етеді.

Іс-шараға құқық қорғау және бақылаушы органдардың өкілдері, облыстық басқармалар мен қалалық әкімдік бөлімдерінің басшылары, Қазақстанның Халық кеңесінің мүшелері, қоғамдық кеңес және құрылыс компанияларының өкілдері қатысты.

Кеңес барысында қаржылық құқық бұзушылықтардың алдын алу, бюджет қаражатының сақталуын қамтамасыз ету және инфрақұрылымдық жобаларды уақытылы аяқтау мәселелері қаралды. Мемлекеттік тапсырыс берушілер мен мердігер ұйымдардың орындалатын жұмыстардың сапасы мен нәтижесіне жауапкершілігіне ерекше назар аударылды.

Қатысушылар проблемалық құрылыс нысандарын, жұмыстардың созылу себептері мен жобалар құнының өсу мәселелерін талқылады. Жобалық-сметалық құжаттаманың сапасын арттыру, нақты орындалған жұмыстар көлемін қатаң бақылау және мердігерлер келісімшарт міндеттемелерін бұзған жағдайда уақытылы шара қабылдау қажеттігі атап өтілді.

Сондай-ақ тұрғын үй құрылысына үлестік қатысу саласындағы тәуекелдер, оның ішінде азаматтардың қаражатын заңсыз тарту және қажетті рұқсат құжаттарының болмауы мәселелері жеке қаралды. Мұндай фактілерді уақытылы анықтап, үлескерлердің құқықтары мен заңды мүдделерін қорғаудың маңыздылығы айтылды.

– Президент Жолдауында белгіленген «Халықтық құрылыс» бастамасы әрбір инфрақұрылымдық жобаның заңдылығын, сапасы мен ашықтығын қамтамасыз етуді талап етеді. Бүгін көтерілген барлық ұсыныстар мен мәселелер хаттамаға енгізіліп, олардың әрқайсысының шешілу барысы бақылауда болады. Біздің ортақ мақсатымыз – Ақтаудың жоспарлы дамуын қамтамасыз ету, қаланың үйлесімді сәулеттік келбетін қалыптастыру, сапалы жолдар салу және тұрғындар үшін қауіпсіз әрі қолайлы жағдай жасау. Бұл мақсатқа жету үшін мемлекеттік органдардың, кәсіпкерлер мен қоғам өкілдерінің жауапты әрі үйлесімді жұмысы қажет, – деді қала әкімі Мақсат Мұқаш.

Кеңес қорытындысы бойынша құқық бұзушылықтардың алдын алу, бюджет қаражатын мақсатты әрі тиімді пайдалану және құрылыс пен жол жобаларын уақытылы аяқтау үшін ведомствоаралық өзара іс-қимылды күшейту қажеттігі атап өтілді.