Еліміздің батысында «Айбалта-2025» оқу-жаттығуы басталды
Қазақстанның батысында «Айбалта-2025» жедел-стратегиялық командалық-штабтық оқу-жаттығуының алғашқы кезеңі басталды, деп хабарлайды otpannews.kz Ақтау гарнизонының баспасөз қызметіне сілтеме жасап.
Оқу-жаттығуға «Батыс» және «Шығыс» өңірлік қолбасшылықтарының әскери бөлімдері мен құрамалары қатысып жатыр. Әскерилер дабыл бойынша көтеріліп, толық жауынгерлік дайындыққа келтірілді.
Маневрлерге 3 мыңнан астам әскери қызметші және 1 мыңнан аса қару-жарақ пен әскери техника жұмылдырылды. Оның ішінде ұшақтар, тікұшақтар және ұшқышсыз ұшу аппараттары бар.
Оқу-жаттығу төрт кезеңнен тұрады. Бірінші кезеңде әскери қызметшілер дабыл жарияланған кездегі іс-қимылды орындап, белгіленген ауданға марш жасап, оқу-жауынгерлік тапсырмаларды орындауға кірісті.
Практикалық жаттығулар күндізгі және түнгі уақытта өтіп жатыр. Оқу-жаттығу барысында әскер тектерінің өзара іс-қимылы, командалық басқару қабілеті, логистика, тактикалық байланыс және бөлімшелердің күрделі климаттық жағдайда маневр жасау
тәжірибесі жетілдіріледі.
Негізгі мақсат – әскери басқару органдарының үйлесімділігін арттыру, қазіргі заманғы ұрыс жүргізу әдістерін жетілдіру және жаңа тәсілдерді сынақтан өткізу.
Айта кетейік, «Айбалта-2025» оқу-жаттығуы 3 қазанға дейін жалғасады.
