Ақтау қаласындағы Абай атындағы мәдени-демалыс кешенінде «Ақтау – Түркі әлемінің мәдени астанасы – 2025» жобасы аясында өткен халықаралық «Өнерлі өрен» балалар шығармашылық фестивалінің жабылу салтанаты өтті, деп хабарлайды otpannews.kz.

Фестивальге Түркия, Әзірбайжан, Өзбекстан, Қырғызстан, Түрікменстан, Ресейдің Татарстан, Башқұртстан, Тыва, Қырым өңірлерінен, сондай-ақ Қазақстанның әр аймағынан келген 500-ден астам жас өнерпаз қатысты. Олар дәстүрлі ән, вокал, хореография, аспаптық орындау және бейнелеу өнері бойынша өз шеберліктерін көрсетті.

Байқаудың әділқазылар алқасы 15-тен астам түркі тілдес елден шақырылған халық әртістері мен мәдениет майталмандарынан құралды. Фестиваль барысында балалар тек өнер көрсетіп қана қоймай, тәжірибе алмасып, жаңа достар тауып, шығармашылық ортада шабыттанды.

– Байқау төрт күнге созылды. Әр қатысушы өзін жаңа қырынан танытуға мүмкіндік алды. Фестивальдің маңызы зор деп есептейміз. Мұндай ауқымды іс-шаралар балалардың рухани дамуына, ұлттық өнерге қызығушылығын арттыруға үлкен серпін береді, – деді Абай мәдени-демалыс кешені басшысының орынбасары Маргарита Омарова.