Жазғы демалыста - Маңғыстауға: Туризм және спорт министрлігі өңірдің үздік 10 бағытын ұсынды
Еліміздің Туризм және спорт министрлігі биылғы жазғы туристік маусымда Маңғыстау облысына ерекше басымдық беріп отыр. Министрлік өңірдің табиғи, тарихи және рухани мұраларын қамтитын жазғы демалысқа арналған ТОП-10 туристік бағыттың тізімін жариялады. Тізімге қазақстандықтармен қатар шетелдік саяхатшылар арасында да сұранысқа ие көрікті орындар енгізілген, деп жазады otpannews.kz.
Министрлік мәліметінше, Маңғыстау өңірі ерекше геологиялық ландшафттары, Каспий теңізінің жағалауы, тарихи-мәдени ескерткіштері мен табиғи нысандарының сан алуандығы арқылы туристерді қызықтырады.
Тізімнің көшін өңірдің ең танымал табиғи символдарының бірі - Бозжыра шатқалы бастап тұр. Ақ борлы жартастарымен, таңғажайып жартас пішіндерімен әйгілі бұл мекен жаяу серуендеуге, фототурлар мен жол талғамайтын көлікпен саяхат жасауға қолайлы.
Сондай-ақ туристерге Торыштағы «Шарлар алқабы» ұсынылған. Дөңгелек пішінді алып тас түзілімдерімен танымал бұл жер Маңғыстаудың ең жұмбақ геологиялық ескерткіштерінің бірі саналады.
Табиғаттың ерекше туындыларының қатарында Айрақты-Шоманай таулары мен Қарынжарық ойысы да бар. «Қамалдар аңғары» атанып кеткен Айрақты-Шоманайдың ерекше бедері мен каньондары саяхатшыларды қызықтырса, теңіз деңгейінен төмен орналасқан Қарынжарықтың тұзды жазықтары мен көркем көріністері өңірдің ең әсерлі табиғи орындарының бірі ретінде бағаланады.
Жазғы демалысқа қолайлы орындардың қатарында Тамшалы шатқалы да аталды. Жартастан тамшылап ағатын табиғи бұлақтары мен жасыл оазисі бұл жерді табиғат аясында тынығуға және серуендеуге қолайлы етеді.
Министрлік Каспий жағалауындағы Ақтау қаласының жағажайларын да ерекше атап өтті. Мұнда демалушылар теңізге шомылып, су спорттарымен айналысып, қайықпен серуендей алады.
Рухани туризмді қалайтындар үшін Бекет ата жерасты мешіті ұсынылған. XVIII ғасырдағы көрнекті діни қайраткердің есімімен байланысты қасиетті орын өңірдегі маңызды тарихи-рухани нысандардың бірі болып саналады.
Туристік бағыттар қатарына сондай-ақ Боқты тауы, Тұзбайыр соры және түрлі-түсті жыныс қабаттарымен танымал Қызылқұп («Тирамису» шатқалы) енгізілді. Бұл орындар ерекше табиғи келбетімен, фототурлар мен экологиялық саяхаттарға қолайлылығымен ерекшеленеді.
Министрлік Маңғыстаудың бірегей табиғи және тарихи мұрасы өңірдің туристік әлеуетін арттырып, ішкі және халықаралық туризмді дамытуға серпін береді деп есептейді. Жарияланған бағыттар жазғы демалысты ел ішінде өткізуді жоспарлаған саяхатшылар үшін тиімді маршрут ретінде ұсынылып отыр.
