Маңғыстаулық Гүлнұр туған күнінде өз таңдауын жасады
Маңғыстауда бүгін 18 жасқа толған Гүлнұр Қойшыбай тұңғыш рет референдумға қатысып, туған күнінде таңдау жасады. Каратэ-до спортынан Әлем чемпионатының күміс жүлдегері Гүлнұр Ақтау қаласындағы 17 шағынауданда орналасқан №251 референдум учаскесіне келіп, дауыс берді.
Гүлнұр бүгінде Маңғыстау жоғары педагогикалық колледжінде 3-курста оқиды. Мамандығы - жаттықтырушы. Он жылдан астам уақыт спортпен шұғылданған шымыр бойжеткен болашақта да спорт саласында шыңдалуға шынайы ниетті.
«Мені спортқа жетелеп әкелген - әкем. Бастапқыда жай қызығып, кейін кәсіби түрде шұғылдана бастадым. Үйдің үлкенімін. Қазір іні-де спортпен айналысады. Мен бірнеше дүркін Азия чемпионатының жүлдегерімін», - дейді Гүлнұр Қойшыбай.
Оның айтуынша, спортта табандылық, тұрақтылық мен ұстаным өте маңызды. Ал референдум еліміздің жарқын болашағына бейжай қарамайтын азаматтардың саяси ұстанымын айқындайды.
«Бүгін - менің туған күнім әрі алғаш рет дауыс бердім. Ерекше сезім екен. Мен елімнің жарқын болашағы үшін таңдау жасадым», - дейді Гүлнұр Қойшыбай.
14
Комментарии
Комментарии
Нет комментариев
