Маңғыстаудың экономикалық серпіні: «Ақтау теңіз порты» АЭА 121 миллиард теңге болатын жобаларды бастады
2025 жыл Маңғыстау өңірінің инвестициялық климаты үшін жемісті жыл болды. «Ақтау теңіз порты» арнайы экономикалық аймағында (АЭА) құны 121,6 млрд теңгені құрайтын 15 жаңа инвестициялық жоба қолға алынды. Бұл бастамалар аймақта 1800-ден астам жаңа жұмыс орнын ашуға жол ашады, деп хабарлайды otpannews.kz сайты.
Бұл туралы Қоғамдық коммуникация орталығында өткен брифингте «Ақтау теңіз порты» АЭА» АҚ басқарма төрағасы Мүбәрак Тулегенов пен атқарушы директор Гүлмира Әбішева мәлімдеді.
Стратегиялық маңызы бар ірі жобалар
Жаңадан тіркелген 15 компанияның жобалары тек өңір үшін емес, ел экономикасы үшін де стратегиялық маңызға ие. Соның ішінде ерекше атап өтетін нысандар:
- Контейнерлік хаб: Порт арқылы тасымал көлемін 3 есеге арттырады.
- «Саржа» теңіз терминалы: 2028 жылға қарай жылына 11 млн тонна жүк өткізуге қауқарлы болады.
- Теңіз фермасы: Каспийдің ашық айдынында алғаш рет албырт балығын өсіру қолға алынды.
- Өндірістік зауыт: Жаңаөзен қаласында компрессорлық құбырлар шығаратын ірі кәсіпорын іске қосылмақ.
«Мемлекет басшысының қолдауымен іске қосылған контейнерлік хаб Каспий маңы және Орталық Азия елдері үшін тұрақты логистикалық сервис қалыптастырады. Бұл біздің транзиттік әлеуетімізді мүлдем жаңа деңгейге көтереді», — деді Мүбәрак Тулегенов.
Биылғы жылдың алғашқы үш тоқсанында АЭА айтарлықтай нәтижелер көрсетті. Тартылған инвестиция 25,1 млрд теңгені құрады (оның 6,29 млрд теңгесі — тікелей шетелдік инвестиция). Ал өндірілген өнім – 58,3 млрд теңге. Сондай-ақ 5,7 млрд теңге бюджетке аударылды. Одан бөлек 666 маман тұрақты жұмыспен қамтылды.
Гүлмира Әбішеваның айтуынша, Қазақстан мен Қытай арасындағы ынтымақтастық аясында дамып жатқан Транскаспий халықаралық көлік дәлізінің (ТХКД) өткізу қабілеті 2030 жылға қарай 5 млн тонна құрғақ жүкке және 7 млн тонна сұйық жүкке дейін артады.
«Ақтау теңіз порты» АЭА бүгінде инвесторлар үшін ең тиімді және келешегі зор алаңдардың бірі ретінде өз мәртебесін нығайтып келеді.
