Каспий теңізінде Қазақстан Әскери-теңіз күштерінің ауқымды оқу-жаттығулары басталды
Қазақстанның Каспий теңізіндегі секторында Әскери-теңіз күштерінің жоспарлы жауынгерлік даярлық жаттығулары өтіп жатыр. Қорғаныс министрлігінің мәліметінше, шараның басты мақсаты – кеме экипаждарының теңіз жағдайындағы кәсіби дағдыларын тексеру және жетілдіру, деп хабарлайды otpannews.kz сайты.
Үш кезеңнен тұратын масштабты оқу-жаттығу барысында экипаждар Қазақстан секторына тиесілі су айдынын толық жүріп өтіп, навигациялық дәлдікті сақтауды тексеруде. Сондай-ақ кемелер арасындағы өзара іс-қимыл, кемені басқару және жағалаудан едәуір қашықтықта әрекет ету ерекше назарға алынды. Бұдан бөлек жаттығу кезеңдері біртіндеп күрделеніп, әскери теңізшілер штаттық қару-жарақтан практикалық атыс жүргізуде.
Әскери-теңіз күштері Бас қолбасшысының жауынгерлік даярлық жөніндегі орынбасары, 1-дәрежелі капитан Арман Сатқановтың айтуынша, басты назар әрбір әскери қызметшінің өз міндетін нақты біліп, күрделі жағдайда жедел әрі үйлесімді әрекет етуіне аударылады. Бұл шаралар елдің Әскери-теңіз күштерінің кез келген жағдайда жауынгерлік міндеттерді орындауға дайындығын айтарлықтай арттырады.
