«Ақтау теңіз порты» АЭА Маңғыстауға инвестиция салудың 5 басты себебін атады

«Ақтау теңіз порты» арнайы экономикалық аймағы Маңғыстау облысына инвестиция салудың негізгі бес артықшылығын атады, деп жазады otpannews.kz.

«Ақтау теңіз порты» мәліметінше, өңірдің дамыған көлік-логистикалық әлеуеті мен инвесторларға ұсынылатын жеңілдіктер Маңғыстауды өндіріс пен бизнес үшін тартымды бағыттардың біріне айналдырып отыр.

Бірінші себеп - халықаралық нарыққа тікелей шығу мүмкіндігі. Маңғыстау – Каспий теңізіндегі Қазақстанның басты көлік-логистикалық қақпасы. Өңір Транскаспий халықаралық көлік бағыты арқылы Қытай, Кавказ, Түркия және Еуропа нарықтарына шығуға мүмкіндік береді.

Екінші артықшылық - «Ақтау теңіз порты» АЭА жеңілдіктері. Арнайы экономикалық аймақ инвесторларға салықтық және кедендік жеңілдіктер, еркін кеден аймағы режимі, дайын өндірістік инфрақұрылым, инвестициялық жобаларды кешенді сүйемелдеуді ұсынады.

Үшінші себеп - дайын өнеркәсіптік нарық. Маңғыстау – Қазақстанның жетекші мұнай-газ және өнеркәсіптік өңірлерінің бірі. Өңірде жабдықтарға, металл өнімдеріне, құрылыс материалдарына, химиялық өнімдерге және өндірістік сервистерге тұрақты сұраныс бар.

Төртінші артықшылық - дамыған мультимодальды логистика. Өңірде теңіз, теміржол, автомобиль және әуе көлігі инфрақұрылымы толыққанды дамыған. Бұл өнімді Қазақстанның ішкі нарығына ғана емес, Әзербайжан, Кавказ, Түркия және Еуропа елдеріне тиімді жеткізуге мүмкіндік береді.

Бесінші себеп - өндірісті жергіліктендіруге қолайлы орта. Маңғыстау жаңа өндірістерді дамытуға басымдық береді. Өңірде өндірістік кооперацияны дамытуға, импортты алмастыруға және өңірлік жеткізу тізбектерін қалыптастыруға барлық жағдай жасалған.

«Ақтау теңіз порты» АЭА өкілдерінің айтуынша, аталған артықшылықтар өңірдің инвестициялық әлеуетін арттырып, жаңа өндірістерді іске асыруға және халықаралық серіктестікті кеңейтуге мүмкіндік береді.