Ақтауда Каспий күніне орай экологиялық шаралар өтіп жатыр
Ақтауда Каспий күніне орай бірқатар іс-шара ұйымдастырылып жатыр. Халықаралық акция аясында қала жағалауында волонтерлер, жастар ұйымдарының өкілдері және көршілес елдерден келген қонақтар қатысқан экологиялық сенбілік өтті, деп хабарлайды otpannews.kz.
Іс-шара Каспий маңы мемлекеттерінде бір мезетте ұйымдастырылған халықаралық челлендж аясында өтіп жатыр. Экологиялық акциялар Қазақстан, Ресей, Түрікменстан, Иран және Әзербайжанда ұйымдастырылуда.
Маңғыстау облысы жастар саясаты мәселелері жөніндегі басқарма басшысының міндетін атқарушы Қалампыр Қожахметқызының айтуынша, Ақтаудағы сенбілікке өңір тұрғындарымен қатар Қырғызстан, Тәжікстан және Өзбекстаннан келген делегациялар да қатысты.
«Бұл – халықаралық деңгейде ұйымдастырылып отырған алғашқы ауқымды сенбіліктердің бірі. Бүгін Ақтау жағалауын тазартуға көршілес бауырлас мемлекеттерден келген қонақтарымыз да атсалысып жатыр», – деді ол.
Іс-шара бағдарламасы таңғы жаттығудан басталды. Одан кейін қатысушылар плоггинг форматындағы спорттық экологиялық акцияға қатысты. Яғни олар жүгіріп немесе жүріп келе жатып, жол бойындағы қоқыстарды жинады.
Шара барысында экологиялық ағарту жұмыстарына және қоршаған ортаға жауапкершілікпен қарау мәдениетін қалыптастыруға ерекше мән берілді.
«Жаңа адамдар» жастар қозғалысының өкілдері негізгі міндет тек жекелеген экологиялық акцияларға қатысу емес, адамдардың табиғатқа деген көзқарасын өзгерту екенін атап өтті.
Ақтаудағы қозғалыс жетекшісі Ануарбек Алишердің айтуынша, ұйым тұрғындардың бойында патриоттық сезім қалыптастырып, Каспийдің адам өмірінің ажырамас бөлігі екенін түсіндіруді көздейді.
«Адамдардың бойында патриоттық сезім мен Каспийдің біздің өміріміздің бір бөлігі екенін түсінуін қалыптастырғымыз келеді. Жауапкершілігіміз тек өз үйімізбен немесе отбасымызбен шектелмеуі керек. Ол табиғатқа, Қазақстанға және адамдарға да қатысты болуы тиіс», – деді ол.
Іс-шара аясында экологиялық өнімдер мен жергілікті шеберлердің қолөнер бұйымдары ұсынылған жәрмеңке де ұйымдастырылды. Қала тұрғындары мен қонақтарына өсімдіктер, кәдесыйлар және табиғи материалдардан жасалған қолөнер бұйымдары таныстырылды.
Ұйымдастырушылардың айтуынша, Каспий күніне орай өткізіліп жатқан шаралар Каспий маңы өңірлері мен мемлекеттерінің тұрғындарын ортақ экологиялық мәселелер төңірегінде біріктіруге бағытталған. Акциялар Каспий теңізінің экологиялық жағдайына назар аударып, табиғи ресурстарын сақтауға жауапкершілікпен қарау мәдениетін қалыптастыруды көздейді.
