Биыл Ақтауда мектеп формасы мен оқу құралдарының бағасы қанша тұрады?
Жаңа оқу жылының басталуына санаулы күндер қалды. Сауда орталығы мен базарда ата-аналар мен оқушылардың қарасы қалың. Бірі мектеп формасын алса, енді бірі оқу-құралдарын түгендеуде. Биыл бір баланы мектепке дайындау үшін қанша қаражат кетеді? Осы сауалға жауап іздеген otpannews.kz тілшісі қала базарын аралап көрді.
Ақтаудағы базарды аралап, мектеп формасы мен оқу-құралдарының бағасын білдік. Сөредегі көздің жауын алатын құрал-жабдықтар мен киімдердің бағасы түріне, сапасына қарай әр түрлі. Саудагерлер бағаны алдыңғы жылмен салыстырғанда айырмашылық бар екенін айтады.
"Формалардың бағасы түрі мен сапасына қарай әр түрлі. Мәселен, көйлектер 6 мың теңгеден басталып, 10 мың теңгеге дейін жетеді. Ал костюм-шалбар немесе белдемше жиынтығы («двойкалар») 8 мың теңгеден басталады. Бағалар былтырғыға қарағанда біршама өскен. Жалпы алғанда, бір баланы тек киім-кешектің өзімен ғана толық киіндіруге шамамен 30 мыңдай қаражат кетеді»,- деді саудагер.
Оқушыға ең қажетті оқу-құралдардың да бағасын сұрадық. Құрал-жабдықты маусымдық жәрмеңкелер мен көтерме сауда орындарынан іздесеңіз, біраз үнемдеуге болады.
“Оқу-құралдардың бағасы әр түрлі. Дәптерлердің бағасы 25 теңге, қалам 30 теңге, қаламсап салғыш 400 теңгеден басталады. Бояулар мен күнделіктер де 400-500 теңгеден басталады”,- деді саудагер.
Киім-кешек пен құрал-жабдықтардың бағасын орта есеппен алғанда бір оқушыны мектепке дайындау үшін шамамен 100 мың теңгедей қаражат кетеді. Әрине, бұл орташа көрсеткіш. Бала мен ата-ананың талғамы және қажеттілігіне байланысты бұл қаражаттың мөлшері өзгере береді.
