11 жыл үздік оқыған Шетпе түлегіне «Алтын белгі» берілмей, оқу грантынан айырылуы мүмкін еді

Шетпе ауылының 11-сынып түлегі Үміт Романқызы мектепті 11 жыл үздік оқыса да «Алтын белгі» төсбелгісіне үміткер болмаған. Осыған байланысты Алматыдағы «Тұран» университетінен жеңіп алған төрт жылдық оқу грантынан айырылып қалуы мүмкін болды. Маңғыстау облыстық білім басқармасы биылғы түлектің үндеуінен кейін тексеру жүргізіп, аудандық білім бөліміне қажетті шара қолдануды тапсырды, деп хабарлайды otpannews.kz.

Бұл жағдай туралы Үміт Романқызы Threads әлеуметтік желісінде айтып берді. Оның айтуынша, ол 11 жыл бойы тек үздік баға алғанымен, «Алтын белгі» төсбелгісіне үміткерлер тізіміне енгізілмеген. Сонымен қатар түлек байқау жеңімпазы атанып, Алматыдағы «Тұран» университетінде төрт жыл бойы тегін оқу мүмкіндігіне ие болған. 

Алайда, Үміттің айтуынша, расталған «Алтын белгі» төсбелгісінің болуы бұл грантты алудың міндетті шарттарының бірі болған. Нәтижесінде қыз бір мезгілде «Алтын белгісіз» қалып, тегін білім алу мүмкіндігінен айырылып қалу қаупімен бетпе-бет келді. 

«Мен байқау жеңімпазы атанып, Алматы қаласындағы «Тұран» университетінде 4 жыл бойы тегін оқу мүмкіндігіне ие болдым. Оқуға түсу үшін маңызды бір шарт – «Алтын белгінің» болуы. Алайда, ол менде жоқ. Енді тегін оқу арманымен қоштасуға тура келеді сияқты», - деп жазды Үміт Романқызы. 

Үндеу жарияланғаннан кейін бұл жағдайды Маңғыстау облыстық білім басқармасы қарады. Ведомство Үміттің өтініші бойынша тексеру жүргізіп, оның қорытындысы бойынша Маңғыстау аудандық білім бөліміне нақты тапсырмалар берілгенін хабарлады. 

Басқарма бұл мәселе 10 тамызда арызданушының пайдасына шешілгенін айтты. 

«Аудандық білім бөлімі жүргізген жұмыстардың нәтижесінде 2026 жылдың 10 тамызында азаматтың өтініші толығымен қанағаттандырылды», - деп хабарлады Маңғыстау облыстық білім басқармасы. 

Мәселені түпкілікті шешу үшін қызға Шетпе ауылында орналасқан Маңғыстау аудандық білім бөліміне хабарласу ұсынылды. Сонымен қатар, ведомство орын алған жағдайға байланысты жауапты тұлғаларға тиісті шаралар қолданылатынын мәлімдеді.