Гүлсезім Әбдіжәлел

18:03, 30 қыркүйек 2026

Джеки Чанмен жұмыс істеген ақтаулық полиглот тәжірбиесімен бөлісті

Маңғыстау өңірінде түсірілген «Доспехи Бога: Ультиматум» фильмінде аудармашы болып қызмет атқарған Ерсұлтан Ислам otpannews.kz студиясына келіп, түсірілім алаңындағы қызықты естеліктерімен бөлісті.- Ерсұлтан, студиямызға қош келдіңіз! Алдымен өзіңіз туралы айтып өтсеңіз. «Доспехи Бога: Ультиматум» фильмінің түсіріліміне қалай келдіңіз? - Қош көрдік, шақырғандарыңызға рақмет! Мен ағылшын, қытай және орыс тілдерінде еркін сөйлеймін. Оған қоса Atatrip.kz компаниясының негізін қалаушымын. Джеки Чанның жобасына келу – үлкен бақ пен сәттілік. «Доспехи Бога: Ультиматум» фильмінің түсірілім алаңында жұмыс істеу мен үшін тебіреніске толы болды. Жобаға келмес бұрын Джеки Чанмен Бозжырада бірге түскен суретті жасанды интеллект көмегімен жасап, әлеуметтік желіге салған едім. Сурет көпшіліктің назарын аударып, әр түрлі елден "Әртіспен қалай кездессек болады?" деген хабарламалар түсті. Шынымды айтсам, адамдардың сеніп қалғанына бір жағынан ыңғайсыздандым. Бұл жасанды сурет екенін айтуға да ұялдым. Кейін түс көрдім. Түсімде Джеки Чанмен Reels түсіріп жүр екенмін. "Көптің тілегі қабыл болып, расымен актермен бірге жүрмін" деген оймен ояндым. Екі күн өткен соң сағат таңғы 08:00-де: «Доспехи Бога: Ультиматум» фильміне екі аудармашы керек деген хабарлама келіп тұр. Қуаныштан смс-ті үйдегілерге көрсеттім. Жұмысқа қабылдау үшін сұхбат болды. Мен "Күніне екі рет су берсе, Джеки Чанды көрсем, жұмыс істеуге әзірмін" деп әзілдеп едім. Осылайша іріктеуден өтіп, жобаға түстім.- Әлемдік деңгейдегі осындай жобаға қатысатыныңызды алғаш естігенде қандай әсерде болдыңыз? - Шыны керек, қатты қуандым. Қуаныш сезімі біртіндеп тәкаппарлыққа ұласып, кеудемді мақтаныш кернеді. Ол қалпымды жанымдағы достарым байқап қойса керек, мені дер кезінде жерге түсірді. Адам болған соң, кейде осындай үлкен ризыққа мас болып қалатыны бар-ау?- Халықаралық киножобада жұмыс істеу сізге кәсіби тұрғыда қандай тәжірибе берді? - Басқа елден келген кәсіби мамандарды көргенде, өзіме күмәнданып қалғаным рас. Оған қоса кино саласында бірінші рет аудармашы болып қызмет еттім. Бұл оңай жұмыс емес. Күн демей, түн демей еңбек ететін адамдарды көргенде өзімді қамшыладым. Ағылшын және қытай тілдерінде әлі де оқып, сөздік қорымды көбейту керектігін байқадым. Бұған дейін өзім шың деп есептеп келген жетістігім алаңдағы мамандар үшін ештеңе емес екенін көріп, әлі талай еңбек етуім керек екенін түсіндім.- Джеки Чанмен алғаш қалай таныстыңыз? Алғашқы әсеріңіз қандай болды?- Джеки Чанды көрген кездегі сезімді Светқали Нұржан ағамызбен кездескенде сезінгенмін. Нәдір деген нағашы ағамның үйінде Светқали Нұржан ағаны күтіп алғанбыз. Алғаш көргенде айбары мен энергиясынан басым айналып кетті. Әр басқан қадамы жермен тамырлас секілді сезім берді. Дәл осы сезімді түсірілім алаңында екінші рет басымнан өткіздім. Джеки Чанның әр қадамынан ерекше талпыныс сезіледі.- Біз Джеки Чанды экрандағы бейнесі арқылы танимыз. Ал сіз онымен тікелей жұмыс істеген адам ретінде оның қандай қырын байқадыңыз?- Шынымды айтсам, ол кісінің жанында жүруге ұялдым. 72 жаста болса да өте ширақ. Жасы үлкендігіне қарамастан аяққа тік тұрып, жұмысқа жанымен кірісіп жатқанын көргенде, "Неге мен де дәл осындай құлшыныспен жұмыс істемеймін?" деген ой келді. Тіпті бір уақытта жобадан кету туралы шешім қабылдадым. Себебі он күннен кейін маған жүктелген міндет азайды. Ал мен Джеки Чан сияқты еңбекқор адамның жанында қолқусырып босқа жүруге арландым. Міндетімді атқарып болған соң жобадан кеттім. Дегенмен бұл өмірімдегі ең үлкен тәжірибе берген жоба болды.- Ол сізге қалай қарым-қатынас жасады? Қарапайымдылығы немесе адамгершілігі сізді таңғалдырған кез болды ма? - Түсірілім алаңындағы қарапайымдылығы мені тәнті етті. Ол кісі түсетін көптеген кино жанры экшн болғандықтан, "Аман-есен осы жобаны сәтті аяқтаса екен" деген тілек болды. Әлеуметтік желіден түсірілім кезінде қандай жағдайлар болғанын көрген боларсыздар. Соған қарамастан, жұмысты ешқашан тастап кеткен емес. Барлық қарапайым жұмысшылармен таңнан кешке дейін бірге жүріп жұмыс істейді. Жұмысына өте адал адам. Ұйықтаса да, тамақ ішсе де, түсірілім алаңынан бір елі ажыраған емес. Кәсібиліктің шыңы осы деп ойлаймын.- Оның әзілқойлығы туралы көп айтылады. Бірге жұмыс істеген кезде оның бұл қырын байқадыңыз ба? - Иә, дәл солай. Ауыр жұмыс, қауіпті сахна болса да, әзілді ешқашан ұмытпайды. Жан-жағына күлкі сыйлап, үнемі көңілді жүреді. Кинода қандай жанашыр, адамдарға көмектесуге ұмтылса, өмірде де сондай позитивті эмоциямен жүреді. Жылы күлкісін ешкімнен аямайтынын байқадым. "Теңіз мұхитқа не үшін құяды? Себебі мұхит теңізден төмен тұр" деген сөз бар емес пе?! Сол сияқты халық не үшін Джеки Чанды жақсы көріп, әрбір киносын ықыласпен күтеді? Себебі ол кісі барлыға тең қарайды. - Джеки Чанмен болған ең есте қалған әңгімеңіз немесе оқиғаңыз қандай? - Ол кісі бізбен көп сөйлесе қоймады. Қызметкерлермен көмекшілері мен қазақстандық ассистенттері арқылы байланысады. Бір байқағаным, оның ерекше жақсы көретін сөзі: "Work, Work, Work", және " We don't ask why we do or die" деген ұран сөздері бар. Үнемі командасына айтып, мотивация беріп жүреді. Яғни, "Біз не үшін деп сұрамаймыз. Біз істейміз, не өлеміз" деген мағына береді.- Бірнеше тіл білгеніңіздің арқасында үлкен жобада жұмыс істедіңіз. Бұл жастарға тіл үйренуге үлкен мотивация, үлгі болады. Осы туралы айтып өтсеңіз. - Қаржылық қиындықтарға қарамай мені Қытайға оқуға жіберген анама алғыс айтқым келеді. Әке орнын басып, аналық мейірімін төккен адамның арқасында уайымсыз білім алдым. Адамның қолы мен аяғы жетпейтін жерге білім жеткізеді. Осы уақытқа дейін көзім жетті. Кейде "Не үшін оқып жүрмін?" деген сұрақ туындаса да, уақыт өте келе білімнің күшін түсінесің. Тіл білгенімнің арқасында алаңдағы кез келген маманмен еркін сөйлестім.- Бүгін студиямызға келіп, көпшіліктің назарын аударған жоба туралы қызықты мәліметтермен бөліскеніңізге алғыс білдіреміз!

Роза Әділханқызы

16:28, 30 қыркүйек 2026

Ақтаулық гид: Туристерге Маңғыстаудың табиғаты, борлы тастары қызық

Ақтаулық Әсел Дүйсенғалиева жарты жылдан бері гид болып жұмыс істейді. 22 жастағы маманның айтуынша, шетелдік қонақтар әлеуметтік желідегі суреттер мен видеоларды көріп, Маңғыстауды арнайы іздеп келеді. Otpannews.kz сайтының тілшісі гид Әселмен кездесіп, сұхбаттасып келді. Әсел Дүйсенғалиеваның негізгі мамандығы – ағылшын тілі мұғалімі. Ол үш тілде еркін сөйлеп, шетелдіктермен бірге Маңғыстауды аралайды. «Маңғыстаудың табиғатын көру үшін жергілікті тұрғындар да, Қазақстанның басқа өңірлерінің азаматтары да жиі келеді. Бірақ шетелдіктер де аз емес. Осы уақытқа дейін Канада, Филиппин, Нидерланды, Қытай, Ресей және өзге де елдерден келген адамдармен жұмыс істеп көрдім»,- дейді Әсел Дүйсенғалиева. Әселдің айтуынша, шетелдіктер Маңғыстаудың тылсым табиғатын көру үшін бірнеше шақырымды артқа тастайды. Әлеуметтік желіде шетелдіктер арасында “жердегі Марс” ретінде танылған Бозжыра мен “Тирамису” аталып кеткен Қызылкүпке сұраныс көп. «Шетелдіктер әлеуметтік желіден көріп, Бозжыра мен Қызылкүпке апаруды жиі сұрайды. Оларға өлке тарихынан гөрі табиғаты қызығырақ. Бірақ тарихи деректерді айтқанда шетелдіктер қызығушылық танытады. Маңғыстаудың табиғаты, борлы тастары олар үшін өте қызық. Тіпті кей туристер елдеріне кеткеннен кейін олардың достары бір-бірінен естіп, хабарласады. Жақында өткен V Дүниежүзілік көшпенділер ойындарында да туристер бір-біріне айтып, Маңғыстауға арнайы келгендер көп болды»,- дейді гид маманы Әсел. Гид болып жұмыс істеу Әселдің өзіне қатты ұнайды. Ол осы сала арқылы ойлау шеңбері үлкейіп, танымы артқанын атап өтті. «Мен шетелдіктермен тікелей жұмыс істейтініме қуаныштымын. Соның арқасында әлемде мен білмейтін мамандықтардың барын білдім. Тіпті өзгеше армандауды да үйрендім»,- деп аяқтады Әсел Дүйсенғалиева.

Жанкелді Қаржан

15:20, 30 қыркүйек 2026

Азия ойындары: Маңғыстау дзюдошысы қола жүлде үшін күресте есе жіберді

Жапонияда өтіп жатқан Азия ойындарында маңғыстаулық Меруерт Сәрсенова бесінші орынға тұрақтады, деп хабарлайды Otpannews.kz.Әйелдер арасында 52 келіге дейінгі салмақта сынға түскен татами шебері қола жүлде үшін күресте жапон балуанына жол беріп, жүлдеден тыс қалды.Жерлесіміз бүгінгі жарыста ширек финалға дейін жетті. Ол іріктеу кезеңінде Лаос спортшысын жеңді. Алайда жартылай финалға шығар жолда Өзбекстан өкілі Сита Кадамбоевадан жеңіліп қалды. Ал жұбаныш белдесуінде Тәжікстан спортшысы Мәдина Курбонзодадан қосымша уақытта айласын асырып, қола жүлде үшін күресуге мүмкіндік алды.Айта кетейік, бүгін татамиге шыққан Елдос Сметов (60 кг) пен Абиба Әбужақынова (52 кг) финалда жапон спортшыларына жол беріп, күміс жүлдегер атанды. Сметов араға 12 жыл салып, құрлық ойындарының финалында өнер көрсетті.Сондай-ақ ұлттық құрама балуаны Ғұсман Қырғызбаев (66 кг) қола жүлде үшін белдесуде Қытай спортшысына есе жіберіп, қосымша уақытта юко ұпайымен бесінші орынға жайғасты.Дзюдодан белдесулер 2 қазанға дейін жалғасады.

Махаббат Нұржанқызы

14:55, 30 қыркүйек 2026

Түпқарағанда есірткі қолданған ер адам 10 тәулікке қамалды

Түпқараған аудандық соты есірткі қолданған тұрғынға 10 тәулік әкімшілік қамақ жазасын тағайындады, деп хабарлайды otpannews.kz.Оқиға Аташ ауылында болған. «Құқықтық тәртіп» жедел-профилактикалық іс-шарасы кезінде полиция қызметкерлері есірткі қолданды деген күдікпен ер адамды тоқтатқан.Ол медициналық куәландырудан өту үшін Түпқараған аудандық ауруханасына жеткізілген. Дәрігер-наркологтың қорытындысына сәйкес, ер адамның ағзасынан каннабиноидтар мен олардың метаболиттері анықталған.Сот отырысында ер адам кінәсін мойындап, жасаған ісіне өкінетінін айтқан. Сот бұл жағдайды жауапкершілікті жеңілдететін мән-жай ретінде ескерді. Ал жауапкершілікті ауырлататын жағдайлар анықталмаған.Әкімшілік құқық бұзушылық туралы кодекстің 440-1-бабына сәйкес, медициналық көрсетілімсіз есірткі немесе психотроптық заттарды қолданғаны үшін 40 айлық есептік көрсеткіш мөлшерінде айыппұл салу немесе 10 тәулікке дейін әкімшілік қамауға алу көзделген. Бұл ретте адамның әрекетінен қылмыстық құқық бұзушылық белгілері болмауы керек.Сот ер адамды 10 тәулікке әкімшілік қамауға алу туралы шешім шығарды. Сот қаулысы заңды күшіне енді.

Otpan News

14:45, 30 қыркүйек 2026

Маңғыстау облысында құқықтық-профилактикалық керуен өтіп жатыр

28 қыркүйек пен 5 қазан аралығында Маңғыстау облысында «Заң мен тәртіп» жобасы аясында құқықтық-профилактикалық керуен өтуде. Ауқымды шара өңірдің 5 ауданы мен 2 қаласын қамтиды, деп хабарлайды otpannews.kz.Жоба Маңғыстау облысының Ақпарат және қоғамдық даму басқармасының қолдауымен мемлекеттік әлеуметтік тапсырыс аясында «Эко Маңғыстау» қоғамдық бірлестігі тарапынан жүзеге асырылуда.Басты мақсат - халықтың құқықтық сауаттылығын арттыру, құқық бұзушылықтардың алдын алу, сондай-ақ азаматтар мен мемлекеттік институттар арасындағы ашық әрі қолжетімді диалогты дамыту.Құқықтық-профилактикалық керуен құрамына мемлекеттік органдардың, құқық қорғау құрылымдарының, қоғамдық сектордың және бейінді мамандардың өкілдері енген. Мамандар өңірдің қалалары мен аудандарын аралап, тұрғындармен тікелей кездесулер өткізеді.Әрбір аялдама барысында тұрғындар мамандарға өздерін толғандырған мәселелер бойынша тікелей жүгініп, құқықтары мен заңды мүдделерін қорғауға қатысты түсіндірмелер мен практикалық консультациялар ала алады.Іс-шараларға облыс тұрғындары, жастар, үкіметтік емес ұйымдардың өкілдері, қоғамдық белсенділер, мемлекеттік және құқық қорғау органдарының қызметкерлері қатысады.Құқықтық-профилактикалық керуеннің бағыты:* 28 қыркүйек - Маңғыстау ауданы, Шетпе ауылы;* 29 қыркүйек - Түпқараған ауданы, Форт-Шевченко қаласы;* 30 қыркүйек - Жаңаөзен қаласы;* 30 қыркүйек - Қарақия ауданы, Құрық ауылы;* 1 қазан - Бейнеу ауданы, Бейнеу ауылы;* 5 қазан - Мұнайлы ауданы, Маңғыстау ауылы;* 5 қазан - Ақтау қаласы.

Роза Әділханқызы

14:45, 30 қыркүйек 2026

Маңғыстауда заңсыз граффитиге қарсы профилактикалық жұмыстар жүргізілуде

Маңғыстау облысында қоғамдық орындарға рұқсатсыз жазу мен сурет салудың алдын алу жұмыстары күшейтілді, деп хабарлайды otpannews.kz сайты. Облыстық полиция департаментінің мәліметінше, профилактикалық іс-шаралар барысында ғимарат қабырғалары, қоршаулар және басқа да қоғамдық нысандар тексерілген. Нәтижесінде рұқсатсыз салынған жазулар мен суреттер анықталып, оларды өшіру жұмыстары ұйымдастырылды.Полиция өкілдері заңсыз граффити қоғамдық және жеке нысандардың сыртқы келбетіне кері әсер ететінін атап өтті. Осыған байланысты құқық бұзушылықтың алдын алу, заңсыз жазуларды салған адамдарды анықтау және тұрғындарға түсіндіру жұмыстарын жүргізуге басымдық беріліп отыр.Сонымен қатар тұрғындарға қоғамдық мүлікке ұқыпты қарау, абаттандыру талаптарын сақтау және рұқсатсыз граффити салмау қажеттігі түсіндірілді.Полиция департаменті азаматтарды қоғамдық тәртіпті сақтап, елді мекендердің тазалығы мен көркін қорғауға шақырды.

Otpan News

14:37, 30 қыркүйек 2026

Ақтауда жылыту маусымына дайындық барысы талқыланды

Ақтау қаласының әкімі Мақсат Мұқаштың төрағалығымен 2026–2027 жылдардағы күзгі-қысқы кезеңге дайындық мәселелері бойынша жиын өтті, деп хабарлайды otpannews.kz Ақтау қаласы әкімдігінің баспасөз қызметіне сілтеме жасап.Жиында қаладағы тұрғын үйлер мен әлеуметтік нысандардың жылыту маусымына дайындығы, жылу және электр желілерінің техникалық жағдайы, сондай-ақ инженерлік инфрақұрылымның тұрақты жұмысын қамтамасыз ету мәселелері қаралды.Ақтау қалалық тұрғын үй-коммуналдық шаруашылығы бөлімінің басшысы Бексұлтан Шалабаевтың айтуынша, жылыту маусымына дайындық жұмыстары бекітілген іс-шаралар жоспарына сәйкес жүргізілуде. Қаладағы әлеуметтік нысандардың жылыту кезеңіне дайындығы қамтамасыз етілуде.– Жылу желілерінің техникалық жағдайын бағалау мақсатында магистральдық және шағын ауданішілік желілерге гидравликалық сынақ жүргізілді. Нәтижесінде анықталған ақаулар бойынша жөндеу-қалпына келтіру жұмыстары ұйымдастырылды. Қазіргі таңда жұмыстардың басым бөлігі аяқталды, – деді Бексұлтан Шалабаев.Жылу инфрақұрылымын жаңғырту бағытында 4 және 5 шағын аудандарда жалпы ұзындығы 28,3 шақырым жылу желілерін жаңарту жұмыстары жүргізілуде. Сонымен қатар, қаладағы жылу желілерін жаңғыртуға бағытталған бірқатар жобалар әзірленіп, оларды қаржыландыру мәселесі қарастырылуда.Күзгі-қысқы кезеңге дайындық аясында электр желілері мен трансформаторлық қосалқы станцияларда жоспарлы жөндеу жұмыстары жүргізілді. Тозған электр желілерін жаңарту жұмыстары кезең-кезеңімен жалғасуда.Жиын барысында қала әкімі Мақсат Мұқаш жылыту маусымына дайындық жұмыстарының сапасы мен белгіленген мерзімдердің қатаң сақталуы қажеттігін атап өтті.– Жылыту маусымына дайындық жұмыстары толық әрі сапалы аяқталуы тиіс. Әрбір жауапты мекеме өз бағыты бойынша анықталған мәселелерді уақытылы шешіп, белгіленген мерзімдерді сақтауы қажет. Тұрғындарды жылу және электр энергиясымен тұрақты қамтамасыз ету – басты міндеттердің бірі. Осы бағыттағы жұмыстарды күшейтуді тапсырамын, – деді Ақтау қаласының әкімі.Жиын қорытындысы бойынша жауапты мекемелерге жылыту маусымына дайындық жұмыстарын белгіленген мерзімде аяқтау, анықталған ақауларды жою және инженерлік инфрақұрылымның тұрақты жұмысын қамтамасыз ету жөнінде нақты тапсырмалар берілді.

Otpan News

17:52, 29 қыркүйек 2026

Ақтауда азаматтарға мемлекеттік қызметтерді алу тәртібі түсіндірілді

Ақтау қаласында азаматтарға мемлекеттік қызметтерді алу тәртібі және мүгедектікті белгілеу мәселелері бойынша ақпарат беруге бағытталған «Қызмет алушылар күні» өтті, деп хабарлайды otpannews.kz.Іс-шара ҚР Мемлекеттік қызмет істері агенттігінің тапсырмасын іске асыру мақсатында, ҚР Еңбек және халықты әлеуметтік қорғау саласындағы реттеу және бақылау комитетінің Маңғыстау облысы бойынша департаментінің ұйымдастыруымен өткізілді.«Қызмет алушылар күні» - азаматтардың өздерін толғандырған сұрақтарына тікелей жауап алып, медициналық-әлеуметтік сараптама саласындағы мемлекеттік қызметтерді көрсету тәртібі туралы толық ақпарат алуына мүмкіндік беретін ашық форматтағы кездесу.Жиынға департамент мамандарымен қатар, дәрігерлік-консультативтік комиссиялардың төрағалары да қатысты. Мамандар азаматтарға дәрігерлік-консультативтік комиссияның қорытындысынан кейінгі рәсімдер, мүгедектік тобын белгілеу, еңбек ету қабілетінен айырылу дәрежесін анықтау, медициналық тексеруден өту тәртібі және қажетті құжаттарды рәсімдеу мәселелері бойынша түсіндіру жұмыстарын жүргізді.ҚР Еңбек және халықты әлеуметтік қорғау саласындағы реттеу және бақылау комитетінің Маңғыстау облысы бойынша департаменті басшысының міндетін атқарушы Айжамал Қалмағамбетованың айтуынша, мұндай кездесулер халықпен кері байланысты нығайтып, азаматтардың өз құқықтары мен мемлекеттік қызметтерді алу тәртібі туралы хабардарлығын арттыруға мүмкіндік береді.- Басты мақсатымыз - азаматтарға сапалы әрі түсінікті қызмет көрсету, олардың құқықтарын қорғау және қажетті әлеуметтік қолдауды уақытылы алуына жағдай жасау. Азаматтардың көпшілігі мүгедектік тобын белгілеу рәсімі мен медициналық-әлеуметтік сараптамадан өту кезеңдері бойынша сауалдарын қойды. Сондықтан мамандар сараптамаға жолдау тәртібін және азаматтың бұл үдерісте қандай кезеңдерден өтетінін түсіндірді, - деді Айжамал Қалмағамбетова.Департамент мамандары азаматтарға денсаулығына қатысты қажетті медициналық құжаттарды уақытылы рәсімдеп, белгіленген тәртіппен медициналық ұйымдарға жүгінуге кеңес береді.

Otpan News

17:09, 29 қыркүйек 2026

Хабарландыру

Otpan NEWS

15:37, 29 қыркүйек 2026

Маңғыстауда туризм саласында көптеген жобалар жүзеге асып жатыр

Теңіз жағалауы – Ақтау қаласының басты туристік артықшылықтарының бірі. Биыл қалалық инфрақұрылымды дамыту бағытында жаңа серпін беретін бірқатар маңызды жоба басталды.Маңғыстау облысы шетелдік туристерді қабылдау бойынша республика бойынша 5-орынға орналасты. Биыл Үрімші (Қытай) және Батуми (Грузия) бағыттарына жаңадан тікелей тұрақты рейстер және Ереван (Армения) бағытына маусымдық рейс ашылды. Кендірлі демалыс аймағынан жаңа әуежайдың құрылысы қарқынды жүріп жатыр. Жалпы құны 55 млрд теңгені құрайтын бұл нысанды 2026 жылдың соңына дейін пайдалануға берілмек. Бүгінгі күнге Шетпе теміржол вокзалын қайта жаңартуды аяқтадық. Маңғыстау мен Бейнеу вокзалдары жыл соңына дейін пайдалануға беріледі. Сәуір айынан бастап «Қарағанды – Жезқазған» пойызы бағыты Маңғыстауға дейін ұзартылды. Жыл басынан бері Бозжырадағы сервистік орталық, Бейнеудегі демалыс базасы және Шетпедегі «Qazaq Camp» туристік лагері іске қосылды. Бозжыра шатқалына ұзындығы 13,2 шақырымды құрайтын автожол құрылысын басталды.Сонымен қатар, маусым айында Бозжыра жол бойындағы туристік қызмет көрсету орталығы ашылды, қазіргі таңда күніне 100-ден астам туристке қызмет көрсетуде. Теңіз жағалауы — қаламыздың басты мақтанышы. Биыл қалалық инфрақұрылымды дамытуда жаңа серпін бар. Биыл Ақтау қаласында екі маңызды жоба бастау алды. «Ақбота» саябағы мен теңіз жағалауы толықтай абаттандырылып, тұрғындар мен қала қонақтары үшін заманауи әрі жайлы демалыс аймағына айналатын болады. Бұдан бөлек, шомылу маусымының сапасын арттыру мақсатында Солдат жағажайын абаттандыруға жергілікті бюджеттен қаражат бөлінді (сметалық құны - 898,3 млн.тг). Келесі шомылу маусымында қолданысқа беріледі.Сондай-ақ, медициналық және сауықтыру туризмі бағытында Ақтау қаласынан 630 орындық термалды санаторий-курорттық 2 кешен құрылысы басталды. Бұл нысандарды 2027-2028 жылдары аяқтау жоспарланған.

Роза Әділханқызы

15:15, 29 қыркүйек 2026

Ақтаулық тұрғындар қаңғыбас иттердің көптігіне шағымданды

Ақтаудың 32 шағынауданында тұрғындар түнгі уақытта қаңғыбас иттердің көбейіп кеткеніне шағымданды, деп хабарлайды otpannews.kz сайты. Қала тұрғынының айтуынша, әсіресе, 11-үй маңындағы қоршауда иттер көп жиналады.«Міне, бір ай бойы түнде қаңғыбас иттер көшеде жүреді, түнімен үріп, ұйқы бермейді. 11-үйдің жанындағы қоршауда иттер өте көп. Қаңғыбас иттерді аулайтын қызмет бар ма? – деп сұрады тұрғын.Тұрғынның сауалына Ақтау қаласының кәсіпкерлік және ауыл шаруашылығы бөлімінің маманы жауап берді.«Қазіргі таңда қаңғыбас иттерді аулау және жою қызметтерін көрсету бойынша конкурс өткізілді. Конкурс нәтижесінде жеңімпаз анықталды. Қазіргі уақытта келісімшарт жасау жұмыстары жүргізіліп жатыр. Келісімшарт жасалғаннан кейін тиісті жұмыстар басталады», – деді бөлім мамандары.

Махаббат Нұржанқызы

15:12, 29 қыркүйек 2026

Форт-Шевченконың 180 жылдығына арналған мерекелік шаралар өткізілмейді

Түпқараған ауданында Форт-Шевченко қаласының 180 жылдығына арналған мерекелік іс-шаралар өтпейді. Аудан әкімдігінің мәліметінше, 2–3 қазанға жоспарланған мерекелік бағдарламалар тоқтатылды, деп хабарлайды Otpannews.kz.Мерекелік шараларды өткізбеу туралы шешім өңірде қызметтік міндетін атқару кезінде мерт болған әскерилердің қазасына байланысты қабылданған.«Мерейтойлық шараларға жоспарланған демеушілік қаражат қаза тапқан әскери қызметшілердің отбасыларына көмек ретінде беріледі», - деп мәлімдеді Түпқараған ауданының әкімдігі.