Бүгінгі Казахстан және әлемдегі соңғы жаңалықтар

17:49, 10 қараша 2026

«Әділет» партиясының кандидаттары Су өндіру және тасымалдау басқармасының ұжымымен кездесті

«Әділет» партиясынан Жаңаөзен қалалық мәслихат депутаттығына кандидаттар Су өндіру және тасымалдау басқармасының ұжымымен кездесу өткізді.Жиында тұрғындарды сапалы ауызсумен қамтамасыз ету, коммуналдық инфрақұрылымды жаңғырту, су ресурстарын тиімді пайдалану және өндіріс орындарының тұрақты жұмысын қамтамасыз ету мәселелері талқыланды. Сонымен қатар су шаруашылығы саласына заманауи технологияларды енгізу, инженерлік желілердің тозуын азайту және сала мамандарының еңбек жағдайын жақсарту қажеттілігі айтылды.Кандидаттар су мәселесінің өзектілігін атап өтіп, өңірдің тұрақты дамуы халықты және өндіріс орындарын сумен үздіксіз қамтамасыз етуге тікелей байланысты екенін жеткізді.«Мемлекет басшысы өз Жолдауында инфрақұрылымды жаңғырту, табиғи ресурстарды ұтымды пайдалану және халықтың өмір сүру сапасын арттыру мәселелеріне ерекше назар аударды. Маңғыстау өңірі үшін су – стратегиялық маңызы бар ресурс. Халық санының өсуі мен өндіріс көлемінің артуы суға деген сұранысты да көбейтуде. Сондықтан су өндіру және тасымалдау жүйесін жетілдіру, жаңа технологияларды енгізу, су шығынын азайту – уақыт талабы. Ең бастысы, әрбір тұрғын сапалы әрі тұрақты сумен қамтамасыз етілуі тиіс. Бұл бағытта инфрақұрылымды жаңғыртумен қатар, осы салада еңбек етіп жүрген мамандардың еңбегін бағалау және оларға қолайлы жұмыс жағдайын жасау маңызды», – деді Исенбай Абиевич.Сондай-ақ кездесуде партияның сайлауалды бағдарламасында қамтылған тұрғын үй-коммуналдық шаруашылығын дамыту, инвестиция тарту, жаңа жұмыс орындарын құру, білім беру және денсаулық сақтау салаларының сапасын арттыру бағытындағы міндеттер түсіндірілді.Іс-шара соңында мекеме қызметкерлері кандидаттарға толғандырған сұрақтарын қойып, саладағы өзекті мәселелерге қатысты ұсыныстарын жеткізді. Кандидаттар көтерілген мәселелердің маңыздылығын атап өтіп, халықпен тұрақты байланыс орнату мен ашық диалог жүргізудің қажеттілігіне тоқталды.Маңғыстау облыстық мәслихаты депутаттарының сайлауында партиялық тізімді ұсынған «Әділет» партиясы Сайлау қорының қаражатынан төленді.Дайындаған: «Маңғыстау Медиа» ЖШС;Мекенжайы: Ақтау қ., 9 шағынаудан, 42/1;Тапсырыс беруші: Маңғыстау облыстық мәслихаты депутаттарын сайлауына партиялық тізімді ұсынған «Әділет» партиясының атынан өкілдік ететін Нұрбек Қарасайұлы Қарасаев арқылы партияның сайлау қоры қаражаты есебінен дайындалды.

Маңғыстау жаңалықтары

Ақтауда балалар хоккей мен мәнерлеп сырғанауды тегін үйрене алады

Роза Әділханқызы

14:30, 11 қараша 2026

Ақтауда балалар хоккей мен мәнерлеп сырғанауды тегін үйрене алады

OTPANNEWS.KZ – Ақтау қаласында орналасқан Bauyr Arena мұз кешені «Даму» кәсіпкерлікті дамыту қорының қолдауымен жүзеге асқан инвестициялық жобалардың бірі. Заманауи спорт нысаны өңірде хоккей, мәнерлеп сырғанау және басқа да қысқы спорт түрлерін дамытуға мүмкіндік беріп отыр.«Мұз кешенінің құрылысын «Бауыржан ЛТД» ЖШС жүргізді. Жалпы ауданы 22 мың шаршы метрден асатын екі қабатты кешен халықаралық олимпиадалық стандарттарға сәйкес жасалды. Спорт кешенінде кең мұз аренасы, спортшыларға арналған киім ауыстыру бөлмелері, жаттықтырушылар мен төрешілерге арналған кабинеттер және әкімшілік бөлмелер қарастырылған. Сонымен қатар екінші қабатта мұз айдынына панорамалық көрінісі бар кафе орналасқан»,- деді «Бауыржан ЛТД» ЖШС-ның бас директоры Ұлықпан Көбесов. Бүгінде кәсіпорында 44 адам еңбек етеді. Жобаны жүзеге асыру барысында 15 жаңа жұмыс орны ашылған.«Инвестициялық жобаны жүзеге асыру үшін кәсіпорын 450 млн теңге көлемінде кредиттік қаржыландыру тартқан. Жоба «Даму» қорының «Кепілдік қоры 1» және «Өрлеу» бағдарламалары аясында мемлекеттік қолдауға ие болды. Нәтижесінде кешеннің құрылысын іске асыруға және өңірдегі спорт инфрақұрылымын дамытуға мүмкіндік туды»,- деді «Даму» қорының Маңғыстау облысындағы филиал директоры Әлімхан Тілеужанов. Қазір Bauyr Arena базасында балалар мен жасөспірімдерге арналған хоккей және мәнерлеп сырғанау үйірмелері тегін жұмыс істейді. Хоккейге 5–10 жас аралығындағы балалар, ал мәнерлеп сырғанауға 4–7 жас аралығындағы бүлдіршіндер қабылданады.Спорт кешеніндегі үйірмелерде 200-ге жуық бала жаттығады. Сабақтар аптасына бес күн өткізіледі. Ал сенбі, жексенбі күндері тұрғындар спорт кешеніне келіп, конькимен сырғанай алады. Конькиді жалға алып сырғанау құны сағатына – 3000 теңге, өз конькиімен келіп сырғанайтындарға – 2000 теңге.

Спорт

Маңғыстаулық дзюдошылар Қазақстан чемпионатында үш медаль жеңіп алды

Otpan News

09:43, 5 қараша 2026

Маңғыстаулық дзюдошылар Қазақстан чемпионатында үш медаль жеңіп алды

OTPANNEWS.KZ – 23 жасқа дейінгі жастар арасында дзюдодан Қазақстан чемпионатында Маңғыстау облысының құрамасы үш медаль жеңіп алды.3–4 қараша күндері Жезқазған қаласында өткен ел біріншілігінде Гүлдана Теңгелбаева +78 келі салмақ дәрежесінде алтын медаль иеленді. Ол финалдық кезеңде қарсыластарынан басым түсіп, Қазақстан чемпионы атанды.57 келі салмақта өнер көрсеткен Аружан Сәрсенова финалға дейін жетіп, күміс жүлдегер атанды. Ал 74 келіде сынға түскен Ақниет Қонысбай жарыстың қола жүлдегері болды.

Саясат

Қылтима, субұрқақ: Қасым-Жомарт Тоқаев кейбір сөздердің қисынсыз аудармасына қатысты пікір білдірді

Otpan News

15:16, 10 қараша 2026

Қылтима, субұрқақ: Қасым-Жомарт Тоқаев кейбір сөздердің қисынсыз аудармасына қатысты пікір білдірді

OTPANNEWS.KZ. - Бұл туралы Мемлекет басшысы Қасым-Жомарт Тоқаев Халықаралық «Қазақ тілі» қоғамының Х құрылтайында сөйлеген сөзінде айтты.«Бірақ жалпы тіліміз басқа іргелес елдердің тілдерімен салыстырғанда әлдеқайда таза деп айтсақ, дұрыс болар. Мысалы, бұрын өте сирек пайдаланған немесе мүлде пайдаланбаған «тұжырымдама, қағидат, жоспар, сыйақы, шәкіртақы, еңбек өтілі, кешенді, әмбебап, жүйелі, тыңайтқыш, жанармай, көгалдандыру, босқын, қырғи-қабақ соғыс, қоқан-лоқы, лаңкестік, есірткі, бітімгерлік күштер, мәмілегер, ғарыш, зымыран, жаһан, ғаламтор, тікұшақ, жасанды сана, пайыз, сынып» сияқты сөздер тілімізде кең қолданыс тапты. Бұл – жақсы дүние. Бірақ әр жақсы құбылыстың шегі болуы керек. Мысалы, «күйсандық (пианино), қылтима (балкон), субұрқақ (фонтан), себезгі (душ), қырыққабат (капуста), үнқағаз (газет), жеделсаты (лифт), желкөз (форточка)» және тағы басқа жасанды сөздердің қажеттілігі екіталай сияқты. Соңғы кезде дінге қатысты көне сөздеріміздің орнына араб сөздерін жиі қолдану сән болып кетті. Мұның да қажеттілігіне күмән бар. Жалпы, осының бәрі – өте өзекті мәселелер, сондықтан кәсіби ғалымдар өздерінің салмақты пікірлерін ортаға салуы қажет. Тіл ғылымына қатысты әмбебап, бәріне қолжетімді цифрлық жүйе әзірлеу маңызды. Бұл міндетті мемлекеттік деңгейде сапалы орындау үшін құрамына кәсіби тіл мамандары, ғалымдар, сарапшылар мен жалпы қоғам өкілдері кіретін арнайы жұмыс тобын құрған жөн деп санаймын. Жұмыс тобының қызметін үйлестіру Президент Әкімшілігіне жүктеледі», деді Президент.

Танымал

14:57, 4 қараша 2026

Қазақстан Республикасы Құрылтайының үндеуі

Эксклюзив

14:30, 11 қазан 2026

Маңғыстаулық Жантілек Нұртілепұлы дзюдодан әлем чемпионатында өнер көрсетті

Роза Әділханқызы14:34, 24 қыркүйек 2026

Маңғыстаулық суретшілер «рекорд» жасап, 4 метр кенепке сурет салды

Инна Ермакова мен Әсел Мұрзағалиева кенепке 101 тұлғаны бейнелеп, Қазақстан хронологиясын қағазға түсірді. 4 метрлік портретте балбал тастар, йероглифтер мен петроглифтер, сондай-ақ Түрік қағанаты дәуірінен бастап, қазақ хандығы кезеңі мен бүгінгі республиканың жарқын жұлдыздары бейнеленген. Otpannews.kz сайтының тілшісі қос шебердің студиясына барып, ерекше туындымен танысып қайтты. Суретші Инна Ақтауда туып өскендіктен, Қазақстанның халқымен де, тарихы мен өмір салтымен де жақсы таныс. «Жаным – қазақ» дейтін шебер дәл қазір Астанада өтетін креативті жәрмеңкеге дайындалып жатыр. Шілдеде басталған бұл картина Маңғыстау өңірі атынан көпшіліктің назарына ұсынылады. «Бұл картинада Алтын адам, Атилла, Бейбарыс хан, Түрік қағанаты, алғашқы қазақ хандары бейнеленді. Қазір салып жатқаным Алтын Орданың ханы – Ұрыс хан. Бұл картина хронология секілді, солдан оңға қарай ескі заманнан бүгінге дейінгі тұлғалар бейнеленді. Бейнеленген портреттер арасында еліміздің өркениетіне, мәдениетіне үлес қосып, ел болу жолында еңбек еткен ірі тұлғалар бар. Қазақтың зиялы өкілдері, мәдениет майталмандары, Маңғыстаудағы Пір Бекет, Елбасы мен қазіргі Президентіміз және өзге де ірі тұлғаларды жинақтап, бірнеше портреттен тұратын картина жасадық. Бұл картина – өткен жылдың қазанынан бері көп тұлға бейнеленген үшінші шығарма. Ал жалпы тәжірибеміздегі алтыншы сурет»,- деді суретші Инна Ермакова. Иннаның шығармашылықтағы серігі әрі досы – Әсел Мұрзағалиева. Шамамен 3,5 ай бұрын салып бастаған шеберлердің бұл туындысы аяқталуға жақын. «Мен ақ және қара түстермен картинаның негізін саламын, бұл – гризаль деп аталады. Мен салғаннан кейін Инна түрлі түстермен бояп, реңін келтіреді. Біз бірігіп жұмыс істейміз. Қазір мен салып жатқан тұлға – «Біздің Қазақстан» картинасының авторы, суретші Евгений Сидоркин. Оның жары, қазақ кескіндемешісі, театр және кино суретшісі Гүлфайрус Ысмайылова да осы картинада өз орнын тапты»,- деді суретші Әсел. Инна мен Әсел бұл картинаға қосып, суретін салғысы келетін тұлға көп екенін айтады. Бірақ қағаз беті шектеулі болғандықтан, таңдап алуға тура келген. Қазанның 3-4 күндері Астанада өтетін көрмеге дайындалып жатқан шеберлер оны жолға алып кету үшін картинаны демонтаждайды. «Көрмеге картинаны апару үшін демонтаждауға тура келеді. Холсттан қағазды ажыратып, қалыпты сөгу керек. Астанаға жеткесін оны қайта құрамыз. Ол жақта осы картинамызды және өзге де шығармаларымызды көпшілікке ұсынамыз. Көрмеге Маңғыстаудан делегация болып Маңғыстау креатив хабының өкілдері, дизайнерлер, қолөнершілер мен мәдениет қызметкерлері және біз барамыз»,- деді Инна Ермакова. Қазіргі таңда картинаның 90% жұмысы аяқталған. Шеберлер қазанның алғашқы аптасында өтетін көрмеге бару үшін қыркүйектің 27-сі жолға шықпақ. Күндерінің көп бөлігін шеберханада өткізіп жүрген қос суретші соған дейін картинаның барлық жұмысын аяқтайды.

Роза Әділханқызы14:40, 16 қыркүйек 2026

Ақшұқыр тұрғыны бағында анар ағашын өсіреді

Маңғыстаулық тұрғын Ербол Ниетбаевтың бағында 100 түп анар ағашы өседі. Бұл бақта алхоры, жүзім сияқты әр алуан жеміс-жидек те бар. Теміржол саласында жұмыс істейтін электр механигі бақша өсіріп, көгалдандырумен айналысып жүр, деп хабарлайды otpannews.kz сайты. Оның айтуынша, Маңғыстауда да әртүрлі жеміс ағаштарын өсіруге болады. Бастысы – күтім дұрыс болуы керек. Дәл қазір оның бақшасында 300 түп жеміс ағашы бар, оның 100-і – әртүрлі сорттағы анар ағашы. Ербол 2025 жылы банан ағашын да тәжірибе ретінде егіп көрді. «Алма, шие және басқа да жеміс ағаштарын Маңғыстаудың климаттық жағдайында да өсіруге болады. Бананның да өсіп, жерсінуге болатынына көз жеткіздік. Дұрыс жағдай жасалса, жылыжайда, жылы жерде банан өте жақсы өседі. Кез келген бақша өнімі мол өнім беру үшін тозаңдандыру маңызды. Ең бастысы – күтімі дұрыс болуы керек. Уақытты әрі суды үнемдеу мақсатында мұнда тамшылатып суару жүйесі орнатылған. Бір ғана жерден басқару арқылы бақтағы барлық ағашқа су беруге мүмкіндік бар. Бұл әдістің тағы бір тиімділігі – топырақтың кеуіп, қатып қалуына жол бермейді. Соның арқасында ағаштардың тамыры жақсы дамып, өсімдіктердің жерсінуіне оң әсер етеді»,- дейді тұрғын. Ол өсімдіктерді тозаңдандыру мақсатында тіпті ара бағумен де айналысады. Ербол Ниетбаевтың айтуынша, оның негізгі мақсаты – елді көгалдандыру, таза ауа қалыптастыру және келер ұрпаққа жасыл ел қалдыру.

Роза Әділханқызы15:03, 8 қыркүйек 2026

Ақтаулық оқушылар 1 тоннадан астам макулатураны сұрыптауға тапсырды

Төлеген Айбергенұлы атындағы №19 мектеп-гимназиясында қоқыс сұрыптауға арналған контейнерлер орнатылған. Мектептің әр блогында үш-үштен, барлығы 9 қоқыс жәшігі бар, деп хабарлайды otpannews.kz сайты. Бұл контейнерлер мен мектептегі эко-бұрыш география пәнінің мұғалімі, эковолонтер Әйгерім Әбдиеваның экологиялық байқауда ұтып алған грантының есебінен жасалған. «Біздің мектепте қағаздар мен пластик бөтелкелерді, қақпақтарды бөлек жинауға арналған контейнерлер бар. Өткен оқу жылында қойылған бұл контейнерлер мектеп оқушылары арасында пайдалы әдеттер қалыптастыруға септігін тигізіп жатыр. Біз жоғары сыныпта оқитын эковолонтерлар болып, төменгі сынып оқушыларымен экологиялық сабақтар өткіземіз. Мектепте жыл бойы экологиялық іс-шаралар, сабақтар, сенбіліктер үнемі ұйымдастырылады»,- деді Асима Құралбекқызы. Өткен оқу жылының қорытындысы бойынша, 1 тоннадан астам макулатура, 25кг бөтелке, 30кг астам қақпақ жиналып, сұрыптау орталықтарына тапсырылған.

YouTube бейнелер