Роза Әділханқызы14:34, 24 қыркүйек 2026
Маңғыстаулық суретшілер «рекорд» жасап, 4 метр кенепке сурет салды
Инна Ермакова мен Әсел Мұрзағалиева кенепке 101 тұлғаны бейнелеп, Қазақстан хронологиясын қағазға түсірді. 4 метрлік портретте балбал тастар, йероглифтер мен петроглифтер, сондай-ақ Түрік қағанаты дәуірінен бастап, қазақ хандығы кезеңі мен бүгінгі республиканың жарқын жұлдыздары бейнеленген. Otpannews.kz сайтының тілшісі қос шебердің студиясына барып, ерекше туындымен танысып қайтты. Суретші Инна Ақтауда туып өскендіктен, Қазақстанның халқымен де, тарихы мен өмір салтымен де жақсы таныс. «Жаным – қазақ» дейтін шебер дәл қазір Астанада өтетін креативті жәрмеңкеге дайындалып жатыр. Шілдеде басталған бұл картина Маңғыстау өңірі атынан көпшіліктің назарына ұсынылады. «Бұл картинада Алтын адам, Атилла, Бейбарыс хан, Түрік қағанаты, алғашқы қазақ хандары бейнеленді. Қазір салып жатқаным Алтын Орданың ханы – Ұрыс хан. Бұл картина хронология секілді, солдан оңға қарай ескі заманнан бүгінге дейінгі тұлғалар бейнеленді. Бейнеленген портреттер арасында еліміздің өркениетіне, мәдениетіне үлес қосып, ел болу жолында еңбек еткен ірі тұлғалар бар. Қазақтың зиялы өкілдері, мәдениет майталмандары, Маңғыстаудағы Пір Бекет, Елбасы мен қазіргі Президентіміз және өзге де ірі тұлғаларды жинақтап, бірнеше портреттен тұратын картина жасадық. Бұл картина – өткен жылдың қазанынан бері көп тұлға бейнеленген үшінші шығарма. Ал жалпы тәжірибеміздегі алтыншы сурет»,- деді суретші Инна Ермакова. Иннаның шығармашылықтағы серігі әрі досы – Әсел Мұрзағалиева. Шамамен 3,5 ай бұрын салып бастаған шеберлердің бұл туындысы аяқталуға жақын. «Мен ақ және қара түстермен картинаның негізін саламын, бұл – гризаль деп аталады. Мен салғаннан кейін Инна түрлі түстермен бояп, реңін келтіреді. Біз бірігіп жұмыс істейміз. Қазір мен салып жатқан тұлға – «Біздің Қазақстан» картинасының авторы, суретші Евгений Сидоркин. Оның жары, қазақ кескіндемешісі, театр және кино суретшісі Гүлфайрус Ысмайылова да осы картинада өз орнын тапты»,- деді суретші Әсел. Инна мен Әсел бұл картинаға қосып, суретін салғысы келетін тұлға көп екенін айтады. Бірақ қағаз беті шектеулі болғандықтан, таңдап алуға тура келген. Қазанның 3-4 күндері Астанада өтетін көрмеге дайындалып жатқан шеберлер оны жолға алып кету үшін картинаны демонтаждайды. «Көрмеге картинаны апару үшін демонтаждауға тура келеді. Холсттан қағазды ажыратып, қалыпты сөгу керек. Астанаға жеткесін оны қайта құрамыз. Ол жақта осы картинамызды және өзге де шығармаларымызды көпшілікке ұсынамыз. Көрмеге Маңғыстаудан делегация болып Маңғыстау креатив хабының өкілдері, дизайнерлер, қолөнершілер мен мәдениет қызметкерлері және біз барамыз»,- деді Инна Ермакова. Қазіргі таңда картинаның 90% жұмысы аяқталған. Шеберлер қазанның алғашқы аптасында өтетін көрмеге бару үшін қыркүйектің 27-сі жолға шықпақ. Күндерінің көп бөлігін шеберханада өткізіп жүрген қос суретші соған дейін картинаның барлық жұмысын аяқтайды.
