Бүгінгі Казахстан және әлемдегі соңғы жаңалықтар

18:03, 12 қараша 2026

«Әділет» партиясының кандидаттары «ҚазАзот» ұжымымен кездесті

«Әділет» партиясынан Маңғыстау облыстық және Ақтау қалалық мәслихатының депутаттығына үміткерлер «ҚазАзот» акционерлік қоғамының ұжымымен кездесті.Кездесуде кандидаттар кәсіпорын қызметкерлеріне партияның 2026–2031 жылдарға арналған сайлауалды бағдарламасының негізгі бағыттарын таныстырып, өңірдің өнеркәсіптік әлеуетін арттыру, отандық өндірісті қолдау және өнеркәсіп саласы мамандарының әлеуметтік жағдайын жақсарту мәселелерін талқылады.Кандидаттар Мемлекет басшысы Қасым-Жомарт Тоқаевтың Қазақстан халқына Жолдауында айтылған экономиканы әртараптандыру, өндірістің қуатын арттыру және еңбек өнімділігін көтеру жөніндегі міндеттерге тоқталды.«Маңғыстау облысы үшін өнеркәсіп саласының маңызы зор. Әсіресе, «КазАзот» мекемесі ішкі нарықты азотты минералды тыңайтқыштармен қамтамасыз етіп, ауыл шаруашылығы мен өзге де өндіріс салаларының дамуына үлес қосып келеді. Жалпы отандық өндіріс көлемін арттыру, кәсіпорынның өндірістік әлеуетін нығайту және импортқа тәуелділікті азайту маңызды. Өндіріс орындарының тұрақты жұмыс істеуі, кәсіпорындарды заманауи технологиялармен жабдықтау, отандық өнім көлемін арттыру – өңір экономикасын дамытудың маңызды бағыттарының бірі. Осы саладағы қызметкерлердің қауіпсіз еңбек жағдайын қамтамасыз ету, әлеуметтік қолдау көрсету және кәсіби біліктілігін арттыру да назардан тыс қалмауы тиіс. Өйткені өнеркәсіптің дамуы ең алдымен білікті мамандардың еңбегіне байланысты», - деді Римма Мұханова.Кездесу барысында өндірістік қауіпсіздікті қамтамасыз ету, еңбек жағдайын жақсарту, техникалық мамандар даярлау, жас кадрларды өндіріс саласына тарту және кәсіпорынның тұрақты дамуына қажетті жағдай қалыптастыру мәселелері сөз болды.Жиын соңында кәсіпорын қызметкерлері өздерін толғандырған сұрақтарын қойып, кандидаттардан тұшымды жауап алды.Маңғыстау облыстық мәслихаты депутаттарының сайлауында партиялық тізімді ұсынған «Әділет» партиясы Сайлау қорының қаражатынан төленді.Дайындаған: «Маңғыстау Медиа» ЖШС;Мекенжайы: Ақтау қ., 9 шағынаудан, 42/1;Тапсырыс беруші: Маңғыстау облыстық мәслихаты депутаттарын сайлауына партиялық тізімді ұсынған «Әділет» партиясының атынан өкілдік ететін Нұрбек Қарасайұлы Қарасаев арқылы партияның сайлау қоры қаражаты есебінен дайындалды.

Маңғыстау жаңалықтары

Маңғыстау облысында шекара қызметі келісімшарт бойынша әскери қызметке шақырады

Otpan NEWS

18:38, 12 қараша 2026

Маңғыстау облысында шекара қызметі келісімшарт бойынша әскери қызметке шақырады

OTPANNEWS.KZ. - Ұлттық қауіпсіздік комитеті шекара қызметінің Маңғыстау облысы бойынша департаменті келісімшарт негізінде әскери қызмет атқаруға ниетті азаматтарды қабылдайды.Әскери қызметке үміткерлерге бірқатар талап қойылады. Атап айтқанда, үміткер Қазақстан Республикасының азаматы болуы, мерзімді әскери қызметті өткеруі, орта, арнаулы орта немесе жоғары білімі болуы тиіс. Сонымен қатар өзінің және жақын туыстарының соттылығы болмауы, денсаулығы әскери қызметке жарамды болуы қажет.Келісімшарт бойынша қызмет атқаратын әскери қызметшілерге ай сайынғы еңбекақы 250 мың теңгеден басталады. Сондай-ақ әскери қызметші мен оның отбасы мүшелеріне тұрғын үй төлемдері қарастырылған. Оның мөлшері әр адамға 68 мың теңгеден белгіленген.Бұдан бөлек, әскери қызметшілер маусымдық киім-кешекпен тегін қамтамасыз етіледі, медициналық қызметті ақысыз алады. Жыл сайынғы еңбек демалысы 45 күнді құрайды. Сондай-ақ 45 жастан бастап зейнетке шығу мүмкіндігі, мансаптық өсу және кәсіби дамуға жағдай жасалған.Ел тыныштығын күзетіп, Отан алдындағы борышын кәсіби деңгейде атқарғысы келетін азаматтар келісімшарт бойынша әскери қызметке шақырылады.Қосымша ақпарат алу және құжат тапсыру үшін Ақтау қаласы, 1-шағынаудан, 12/5 ғимараты мекенжайына хабарласуға болады.Байланыс телефоны: 8 705 276 01 61.

Спорт

Маңғыстаулық дзюдошылар Қазақстан чемпионатында үш медаль жеңіп алды

Otpan News

09:43, 5 қараша 2026

Маңғыстаулық дзюдошылар Қазақстан чемпионатында үш медаль жеңіп алды

OTPANNEWS.KZ – 23 жасқа дейінгі жастар арасында дзюдодан Қазақстан чемпионатында Маңғыстау облысының құрамасы үш медаль жеңіп алды.3–4 қараша күндері Жезқазған қаласында өткен ел біріншілігінде Гүлдана Теңгелбаева +78 келі салмақ дәрежесінде алтын медаль иеленді. Ол финалдық кезеңде қарсыластарынан басым түсіп, Қазақстан чемпионы атанды.57 келі салмақта өнер көрсеткен Аружан Сәрсенова финалға дейін жетіп, күміс жүлдегер атанды. Ал 74 келіде сынға түскен Ақниет Қонысбай жарыстың қола жүлдегері болды.

Саясат

Қылтима, субұрқақ: Қасым-Жомарт Тоқаев кейбір сөздердің қисынсыз аудармасына қатысты пікір білдірді

Otpan News

15:16, 10 қараша 2026

Қылтима, субұрқақ: Қасым-Жомарт Тоқаев кейбір сөздердің қисынсыз аудармасына қатысты пікір білдірді

OTPANNEWS.KZ. - Бұл туралы Мемлекет басшысы Қасым-Жомарт Тоқаев Халықаралық «Қазақ тілі» қоғамының Х құрылтайында сөйлеген сөзінде айтты.«Бірақ жалпы тіліміз басқа іргелес елдердің тілдерімен салыстырғанда әлдеқайда таза деп айтсақ, дұрыс болар. Мысалы, бұрын өте сирек пайдаланған немесе мүлде пайдаланбаған «тұжырымдама, қағидат, жоспар, сыйақы, шәкіртақы, еңбек өтілі, кешенді, әмбебап, жүйелі, тыңайтқыш, жанармай, көгалдандыру, босқын, қырғи-қабақ соғыс, қоқан-лоқы, лаңкестік, есірткі, бітімгерлік күштер, мәмілегер, ғарыш, зымыран, жаһан, ғаламтор, тікұшақ, жасанды сана, пайыз, сынып» сияқты сөздер тілімізде кең қолданыс тапты. Бұл – жақсы дүние. Бірақ әр жақсы құбылыстың шегі болуы керек. Мысалы, «күйсандық (пианино), қылтима (балкон), субұрқақ (фонтан), себезгі (душ), қырыққабат (капуста), үнқағаз (газет), жеделсаты (лифт), желкөз (форточка)» және тағы басқа жасанды сөздердің қажеттілігі екіталай сияқты. Соңғы кезде дінге қатысты көне сөздеріміздің орнына араб сөздерін жиі қолдану сән болып кетті. Мұның да қажеттілігіне күмән бар. Жалпы, осының бәрі – өте өзекті мәселелер, сондықтан кәсіби ғалымдар өздерінің салмақты пікірлерін ортаға салуы қажет. Тіл ғылымына қатысты әмбебап, бәріне қолжетімді цифрлық жүйе әзірлеу маңызды. Бұл міндетті мемлекеттік деңгейде сапалы орындау үшін құрамына кәсіби тіл мамандары, ғалымдар, сарапшылар мен жалпы қоғам өкілдері кіретін арнайы жұмыс тобын құрған жөн деп санаймын. Жұмыс тобының қызметін үйлестіру Президент Әкімшілігіне жүктеледі», деді Президент.

Танымал

12:19, 8 қараша 2026

Мұнайлыда 81 жастағы әже немересімен бірге байқауға қатысты

Эксклюзив

14:30, 11 қазан 2026

Маңғыстаулық Жантілек Нұртілепұлы дзюдодан әлем чемпионатында өнер көрсетті

Роза Әділханқызы14:34, 24 қыркүйек 2026

Маңғыстаулық суретшілер «рекорд» жасап, 4 метр кенепке сурет салды

Инна Ермакова мен Әсел Мұрзағалиева кенепке 101 тұлғаны бейнелеп, Қазақстан хронологиясын қағазға түсірді. 4 метрлік портретте балбал тастар, йероглифтер мен петроглифтер, сондай-ақ Түрік қағанаты дәуірінен бастап, қазақ хандығы кезеңі мен бүгінгі республиканың жарқын жұлдыздары бейнеленген. Otpannews.kz сайтының тілшісі қос шебердің студиясына барып, ерекше туындымен танысып қайтты. Суретші Инна Ақтауда туып өскендіктен, Қазақстанның халқымен де, тарихы мен өмір салтымен де жақсы таныс. «Жаным – қазақ» дейтін шебер дәл қазір Астанада өтетін креативті жәрмеңкеге дайындалып жатыр. Шілдеде басталған бұл картина Маңғыстау өңірі атынан көпшіліктің назарына ұсынылады. «Бұл картинада Алтын адам, Атилла, Бейбарыс хан, Түрік қағанаты, алғашқы қазақ хандары бейнеленді. Қазір салып жатқаным Алтын Орданың ханы – Ұрыс хан. Бұл картина хронология секілді, солдан оңға қарай ескі заманнан бүгінге дейінгі тұлғалар бейнеленді. Бейнеленген портреттер арасында еліміздің өркениетіне, мәдениетіне үлес қосып, ел болу жолында еңбек еткен ірі тұлғалар бар. Қазақтың зиялы өкілдері, мәдениет майталмандары, Маңғыстаудағы Пір Бекет, Елбасы мен қазіргі Президентіміз және өзге де ірі тұлғаларды жинақтап, бірнеше портреттен тұратын картина жасадық. Бұл картина – өткен жылдың қазанынан бері көп тұлға бейнеленген үшінші шығарма. Ал жалпы тәжірибеміздегі алтыншы сурет»,- деді суретші Инна Ермакова. Иннаның шығармашылықтағы серігі әрі досы – Әсел Мұрзағалиева. Шамамен 3,5 ай бұрын салып бастаған шеберлердің бұл туындысы аяқталуға жақын. «Мен ақ және қара түстермен картинаның негізін саламын, бұл – гризаль деп аталады. Мен салғаннан кейін Инна түрлі түстермен бояп, реңін келтіреді. Біз бірігіп жұмыс істейміз. Қазір мен салып жатқан тұлға – «Біздің Қазақстан» картинасының авторы, суретші Евгений Сидоркин. Оның жары, қазақ кескіндемешісі, театр және кино суретшісі Гүлфайрус Ысмайылова да осы картинада өз орнын тапты»,- деді суретші Әсел. Инна мен Әсел бұл картинаға қосып, суретін салғысы келетін тұлға көп екенін айтады. Бірақ қағаз беті шектеулі болғандықтан, таңдап алуға тура келген. Қазанның 3-4 күндері Астанада өтетін көрмеге дайындалып жатқан шеберлер оны жолға алып кету үшін картинаны демонтаждайды. «Көрмеге картинаны апару үшін демонтаждауға тура келеді. Холсттан қағазды ажыратып, қалыпты сөгу керек. Астанаға жеткесін оны қайта құрамыз. Ол жақта осы картинамызды және өзге де шығармаларымызды көпшілікке ұсынамыз. Көрмеге Маңғыстаудан делегация болып Маңғыстау креатив хабының өкілдері, дизайнерлер, қолөнершілер мен мәдениет қызметкерлері және біз барамыз»,- деді Инна Ермакова. Қазіргі таңда картинаның 90% жұмысы аяқталған. Шеберлер қазанның алғашқы аптасында өтетін көрмеге бару үшін қыркүйектің 27-сі жолға шықпақ. Күндерінің көп бөлігін шеберханада өткізіп жүрген қос суретші соған дейін картинаның барлық жұмысын аяқтайды.

Роза Әділханқызы14:40, 16 қыркүйек 2026

Ақшұқыр тұрғыны бағында анар ағашын өсіреді

Маңғыстаулық тұрғын Ербол Ниетбаевтың бағында 100 түп анар ағашы өседі. Бұл бақта алхоры, жүзім сияқты әр алуан жеміс-жидек те бар. Теміржол саласында жұмыс істейтін электр механигі бақша өсіріп, көгалдандырумен айналысып жүр, деп хабарлайды otpannews.kz сайты. Оның айтуынша, Маңғыстауда да әртүрлі жеміс ағаштарын өсіруге болады. Бастысы – күтім дұрыс болуы керек. Дәл қазір оның бақшасында 300 түп жеміс ағашы бар, оның 100-і – әртүрлі сорттағы анар ағашы. Ербол 2025 жылы банан ағашын да тәжірибе ретінде егіп көрді. «Алма, шие және басқа да жеміс ағаштарын Маңғыстаудың климаттық жағдайында да өсіруге болады. Бананның да өсіп, жерсінуге болатынына көз жеткіздік. Дұрыс жағдай жасалса, жылыжайда, жылы жерде банан өте жақсы өседі. Кез келген бақша өнімі мол өнім беру үшін тозаңдандыру маңызды. Ең бастысы – күтімі дұрыс болуы керек. Уақытты әрі суды үнемдеу мақсатында мұнда тамшылатып суару жүйесі орнатылған. Бір ғана жерден басқару арқылы бақтағы барлық ағашқа су беруге мүмкіндік бар. Бұл әдістің тағы бір тиімділігі – топырақтың кеуіп, қатып қалуына жол бермейді. Соның арқасында ағаштардың тамыры жақсы дамып, өсімдіктердің жерсінуіне оң әсер етеді»,- дейді тұрғын. Ол өсімдіктерді тозаңдандыру мақсатында тіпті ара бағумен де айналысады. Ербол Ниетбаевтың айтуынша, оның негізгі мақсаты – елді көгалдандыру, таза ауа қалыптастыру және келер ұрпаққа жасыл ел қалдыру.

Роза Әділханқызы15:03, 8 қыркүйек 2026

Ақтаулық оқушылар 1 тоннадан астам макулатураны сұрыптауға тапсырды

Төлеген Айбергенұлы атындағы №19 мектеп-гимназиясында қоқыс сұрыптауға арналған контейнерлер орнатылған. Мектептің әр блогында үш-үштен, барлығы 9 қоқыс жәшігі бар, деп хабарлайды otpannews.kz сайты. Бұл контейнерлер мен мектептегі эко-бұрыш география пәнінің мұғалімі, эковолонтер Әйгерім Әбдиеваның экологиялық байқауда ұтып алған грантының есебінен жасалған. «Біздің мектепте қағаздар мен пластик бөтелкелерді, қақпақтарды бөлек жинауға арналған контейнерлер бар. Өткен оқу жылында қойылған бұл контейнерлер мектеп оқушылары арасында пайдалы әдеттер қалыптастыруға септігін тигізіп жатыр. Біз жоғары сыныпта оқитын эковолонтерлар болып, төменгі сынып оқушыларымен экологиялық сабақтар өткіземіз. Мектепте жыл бойы экологиялық іс-шаралар, сабақтар, сенбіліктер үнемі ұйымдастырылады»,- деді Асима Құралбекқызы. Өткен оқу жылының қорытындысы бойынша, 1 тоннадан астам макулатура, 25кг бөтелке, 30кг астам қақпақ жиналып, сұрыптау орталықтарына тапсырылған.

YouTube бейнелер