Маңғыстаулық Нұржігіт Екібаев Италиядағы ең қымбат мектепте сабақ береді

Мұнайлы ауданындағы №2 орта мектептің түлегі Нұржігіт Екібаев Италияның ең қымбат мектептерінің бірі “H-Farm International School”-да математикадан сабақ береді. Бұл оның еңбек жолындағы – 5, ал шетелдегі – екінші мектебі, деп хабарлайды otpannews.kz сайты.Нұржігіт Өзбекстанда туып, 2012 жылы елге оралған. Ол Мұнайлы ауданындағы мектепті үздік аяқтағаннан кейін Ақтөбеде орналасқан Қ.Жұбанов атындағы университетті қызыл дипломмен аяқтаған. Оқу біткесін Ақтаудағы орта мектептердің бірінде жұмыс істеп, кейін Италияға жол жүрді.«Мен шетелде математикадан сабақ беріп жүргеніме 2 жылдан асты. Алғашында Миландағы “Blооm International School” мектебінде жұмыс істедім. Қазіргі уақытта Италияның ең қымбат мектептерінің бірі саналатын “H-Farm International School” мектебінде қызмет атқарып жүрмін»,- деді Нұржігіт.Оның айтуынша, Қазақстан мен Италияның элиталы жекеменшік мектептерінде аса айырмашылық жоқ. Бірақ Қазақстан мен Италияның мемлекеттік мектептерін салыстырғанда ерекшеліктер бар. Оған басты себеп – білім саласына көрсетілетін қаржылай қолдау.«Екі елдегі қаржылай қолдау деңгейі – екі түрлі. Бұл жақта мектептер бір ауысыммен ғана оқиды, сондықтан оқу уақыты да ұзақ. Сабақ қыркүйек айынан бастап, маусым айының соңына дейін жалғасады. Бірақ қазақ балалары мен шетелдік балалардың айырмашылығы жоқ. Екі елде де балалар – алғыр. Қазіргі жаһандану заманында әлемнің қай түкпірінен болмасын ақпаратқа қол жеткізу мүмкіндігі – бірдей. Десе де, мәдениет жағынан ерекшеліктер көп»,- деді математик Нұржігіт Екібаев.Нұржігіт болашақта әлемнің ең үздік мектептерінде жұмыс істеуді жоспарлайды. Бірақ ол Нұржігіттің түпкі мақсаты емес, оның мақсаты – әлем мектептеріндегі озық тәжірибені елге әкеліп, қазақ балаларынан мықты математик даярлау. «Жоспарым – әлемнің ең үздік мектептерінде жұмыс істеу және сол жерде алған тәжірибемді Қазақстан мектептерінде қолдану. Адал еңбек етіп, жинаған тәжірибемді қолданып, елімнің дамуына үлес қосқым келеді. «Ат айналып қазығын табар» дегендей, елге келіп жұмыс жасау үнемі ойымда жүреді. Бұйырса алдағы уақытта Қазақстанда еңбек етуге ниеттімін. Қазіргі таңда тек тәжірибе жинау және тәжірибе алмасу мақсатында шетелде жұмыс істеп жүрмін. Мен сондай-ақ онлайн дәрістер өткізіп, шетелге оқуға түсу бойынша консультация да беремін»,- деді Нұржігіт Айтбайұлы.