Ақмарал Берекет

15:18, 6 қараша 2026

Yessenov University-де университеттің 50 жылдығына арналған ғылыми конференция өтті

OTPANNEWS.KZ. – Бүгін, 6 қараша күні Шахмардан Есенов атындағы Каспий технологиялар және инжиниринг университетінде «Тәуелсіз Қазақстан: 50 жылдық білім мен ғылым мұрасы және жасанды интеллект дәуіріндегі жаңа мүмкіндіктер» атты ғылыми-теориялық конференция өтті.1976 жылы негізі қаланған білім ордасының жарты ғасырлық тарихына арналған ауқымды іс-шараға Қазақстан Республикасы Президентінің кеңесшісі Мәлік Отарбаев, Маңғыстау облысы әкімінің бірінші орынбасары Ербол Ізбергенов, мемлекет және қоғам қайраткерлері, зиялы қауым өкілдері, ғалымдар, ардагер ұстаздар, университет басшылығы мен студенттер қатысты.Конференцияны Yessenov University президентінің міндетін атқарушы Ермек Нұрмағанбет құттықтау сөзімен ашты. Іс-шара барысында Қазақстан Республикасы Президентінің кеңесшісі Мәлік Отарбаев Мемлекет басшысы Қасым-Жомарт Тоқаевтың университет ұжымына жолдаған құттықтауын жеткізді.Жиында тәуелсіздік жылдарындағы ұлттық руханияттың дамуы, тарихи сабақтастық, Маңғыстау өңірінің әлеуметтік-экономикалық даму перспективалары, ұлттық мұра мен ұрпақтар сабақтастығы, сондай-ақ университеттің қалыптасу және даму тарихы кеңінен талқыланды.Басқосуда сөз алған қоғам және мемлекет қайраткері, тарих ғылымдарының докторы, профессор Өмірзақ Озғанбайұлы университеттің өңірдің білім, ғылым және мәдениет саласындағы айрықша орнына тоқталды.– Биыл Маңғыстау өңірінің ғылымы, мәдениеті мен білім беру саласында елеулі оқиға болып отыр. Бұл – Шахмардан Есенов атындағы Каспий технологиялар және инжиниринг университетінің 50 жылдығы. Бүгінде білім ордасында 10 мыңнан астам студент білім алып, 400-ден астам ғалым еңбек етеді. Олар білім берумен қатар, өңір үшін маңызды ғылыми зерттеулермен де айналысады. Атап айтқанда, Каспий теңізінің экологиялық мәселелері, тұщы су тапшылығы, мұнай-химия саласы, табиғи байлықтарды зерттеу және тарихи ескерткіштерді сақтау бағытында ауқымды жұмыстар жүргізілуде. Университет түлектерінің 90 пайыздан астамы еңбекке араласып, түрлі салада қызмет етіп жүр. Бұл – оқу орнының өңір дамуына қосып отырған нақты үлесі, – деді Өмірзақ Озғанбайұлы.Университеттің жарты ғасырлық тарихы мен өңірдегі жоғары білімнің қалыптасу жолына да ерекше назар аударылды. Осы жылдар ішінде оқу орны Маңғыстау өңірінің өндірістік және әлеуметтік салаларына мыңдаған маман даярлап, ғылыми мектептердің қалыптасуына және аймақтың зияткерлік әлеуетінің дамуына үлес қосты.Конференция аясында университеттің қалыптасуы мен дамуына елеулі үлес қосқан азаматтарға мемлекеттік наградалар мен ведомстволық марапаттар табысталды. Солардың қатарында университетте 32 жыл бойы еңбек етіп келе жатқан қазақ филологиясы кафедрасының профессоры, филология ғылымдарының докторы Бибайша Нұрдәулетова да бар. Ұстазға «Ерен еңбегі үшін» төсбелгісі табысталды.Профессор өз сөзінде мемлекет тарапынан ғылым саласына көрсетіліп жатқан қолдаудың маңызын атап өтті.– Мемлекет саясатында ғылымға айрықша көңіл бөлініп келеді. Әсіресе, ғылыми ізденіспен айналысатын оқытушылар мен профессорларға қолдау көрсетіліп, ғылыми жобалар мен бағдарламаларды жүзеге асыруға мүмкіндік жасалуда. Өзім де Ғылым және жоғары білім министрлігінің қолдауымен бірнеше ғылыми грант иеленіп, осы бағытта еңбек етіп келемін. Бұл ғылыми әлеуетімізді арттырып, зерттеулерімізді халықаралық деңгейде танытуға жол ашты. Өңір ғылымының дамуына Yessenov University-дің қосып отырған үлесі ерекше. Осы білім ордасында 32 жыл еңбек етіп келемін. Еңбегімнің еленіп, «Ерен еңбегі үшін» төсбелгісімен марапатталуым мен үшін үлкен мәртебе. Мемлекет басшысына, министрлікке және университет басшылығына алғысымды білдіремін, – деді Бибайша Нұрдәулетова.Іс-шара қорытындысында білім, ғылым және өндіріс интеграциясын нығайту, халықаралық ғылыми ынтымақтастықты кеңейту, жасанды интеллект пен цифрлық технологияларды білім беру және зерттеу үдерістеріне енгізу, ғылыми әзірлемелерді практикалық қолданысқа бағыттау мәселелері алдағы кезеңнің басым бағыттары ретінде айқындалды.Ғылыми-теориялық конференция университеттің 50 жылдық мерейтойына арналған мерекелік концертке жалғасты.

Otpan News

09:43, 5 қараша 2026

Маңғыстаулық дзюдошылар Қазақстан чемпионатында үш медаль жеңіп алды

OTPANNEWS.KZ – 23 жасқа дейінгі жастар арасында дзюдодан Қазақстан чемпионатында Маңғыстау облысының құрамасы үш медаль жеңіп алды.3–4 қараша күндері Жезқазған қаласында өткен ел біріншілігінде Гүлдана Теңгелбаева +78 келі салмақ дәрежесінде алтын медаль иеленді. Ол финалдық кезеңде қарсыластарынан басым түсіп, Қазақстан чемпионы атанды.57 келі салмақта өнер көрсеткен Аружан Сәрсенова финалға дейін жетіп, күміс жүлдегер атанды. Ал 74 келіде сынға түскен Ақниет Қонысбай жарыстың қола жүлдегері болды.

Otpan News

10:59, 6 қараша 2026

Қазақстан Президенті мен Иордания Королі келіссөз жүргізді

Ақордада елімізге ресми сапармен келген Иордан Хашимит Корольдігінің Королі II Абдалла бен әл-Хусейнді қарсы алу рәсімі өтті.Мәртебелі мейманның құрметіне Әуе қорғанысы күштерінің тікұшақтары Қазақстан мен Иорданияның Мемлекеттік туларын желбіретіп, Ақорда алдынан ұшып өтті.Салтанатты іс-шара барысында Қасым-Жомарт Тоқаев пен II Абдалла бір-біріне ресми делегация мүшелерін таныстырды. Құрмет қарауылы ротасының бастығы рапорт берген соң Президент оркестрі екі елдің әнұрандарын орындады.Келіссөз аясында Мемлекет басшысы Иордания Королі ІІ Абдалла бен әл-Хусейннің Қазақстанға ресми сапары елдеріміз арасындағы берік достықты, өзара құрмет пен ынтымақтастықты көрсететінін атап өтті.– Иордания – араб әлеміндегі уақыт тезінен өткен сенімді серіктесіміз. Кейінгі жылдары ықпалдастығымыз қарқын ала бастады. Біз арамызда орнаған түрлі деңгейдегі берік саяси диалогты жоғары бағалаймыз. Былтыр екіжақты қарым-қатынас үшін ерекше кезең болды, бір-бірімізге сапармен бардық. Келіссөздер қорытындысы бойынша бірлескен мәлімдеме қабылданды, сондай-ақ министрліктеріміз бен ведомстволарымыздың және іскерлік орта өкілдерінің арасында көптеген құжатқа қол қойылды. Мұның бәрі көпжақты ынтымақтастығымызды одан әрі ілгерілетуге септігін тигізді, – деді Президент.Қасым-Жомарт Тоқаев Қазақстан өзара мүддеге сай барлық салада қол жеткізілген уағдаластықтарды нақты іске асыруға баса мән беретініне тоқталды. Экономикалық ықпалдастық қазақ-иордан қарым-қатынасының негізгі қозғаушы күші болып қала береді. Сонымен қатар академиялық және ғылыми байланыстарды нығайту, өзара туристер ағынын арттыру арқылы мәдени-гуманитарлық ынтымақтастықты кеңейтудің әлеуеті зор.Мемлекет басшысы екі елдің халықаралық және өңірлік күн тәртібіндегі өзекті мәселелерді шешу тәсілдері ұқсас екеніне назар аударып, Иордания Королінің достық байланыстарды нығайтып, қос халықты жақындастыруға қосқан үлесін жоғары бағалады.– Сіздің көреген басшылығыңызбен Иордания парасаттылық әрі байыптылық үлгісін көрсетіп, халықаралық аренада Таяу Шығыс және одан тысқары аймақтардағы бейбітшілік пен тұрақтылықтың дәйекті жақтаушысы ретінде кеңінен танылды. Осы орайда, Қазақстан Өзіңіз он жылдан аса уақыт бұрын бастаған Ақаба процесін жоғары бағалайды. Мұндай форматтағы кездесуге Орталық Азияда алғаш рет ұйымдастырушылардың бірі ретінде қатысу – біз үшін үлкен мәртебе. Сессия бүгінде аса өзекті саналатын жасанды интеллект саласындағы қауіпсіздік тақырыбына арналып отыр. Саммит Орталық Азия өңірінің ұстанымын білдіріп, бейбітшілік пен қауіпсіздікті сақтау жөніндегі бірлескен күш-жігерімізге тың серпін сыйлайтынына сенімдімін, – деді Президент.Король ІІ Абдалла бен әл-Хусейн ықыласпен қарсы алғаны үшін Қасым-Жомарт Тоқаевқа алғыс айтып, Қазақстан мен Иорданияны бұрыннан келе жатқан қарым-қатынас, өзара құрмет, сондай-ақ бейбітшілік пен тұрақтылықты нығайту ісіндегі ортақ ұстаным байланыстыратынын жеткізді.– Өзіңіз еске салғандай, былтыр бір-біріміздің елімізге жасаған сапарларымыз екіжақты қарым-қатынасты ілгерілетуге ерекше серпін берді. Біз қол жеткізілген уағдаластықтарды одан әрі өрбітіп, сауда, инвестиция, туризм, технология және қорғаныс секілді негізгі бағыттарда ынтымақтастықты кеңейтуге ниеттіміз, – деді Иордания Королі.Король ІІ Абдалла Ақаба процесі аясындағы кездесулердің жаңа раундын бірлесе ұйымдастырғаны үшін Қасым-Жомарт Тоқаевқа шынайы ризашылығын білдірді. Оның айтуынша, бұл екі елдің қауіпсіздік саласындағы өңірлік және жаһандық сын-қатерлерді шешуге бейілдігін көрсетеді.Осы орайда, Иордания Королі өңірлік қауіпсіздікті қамтамасыз ету, сондай-ақ терроризм мен экстремизмге қарсы күрес ісінде Қазақстанмен ықпалдастықты кеңейтуге мүдделі екенін растады.

Инсульттің алдын алу: Ақтауда дәрігерлер тегін тексеру өткізді