15:51, 4 қараша 2026
«Әділет» партиясының кандидаттары МАЭК ұжымымен кездесті
Бүгін 4 қарашада «Әділет» партиясынан Маңғыстау облыстық мәслихатының депутаттығына кандидаттар «МАЭК» кәсіпорнының қызметкерлерімен кездесу өткізді. Іс-шарада кандидаттар Мемлекет басшысының Жолдауында айтылған маңызды мәселелерді талқылады. Атап айтқанда, энергетика әлеуетін нығайту, өнеркәсіпті жедел технологиялық жаңарту, су ресурстарын ұтымды пайдалану және инвестициялық ахуал бойынша сөз қозғады. Кандидат Кирилл Осиннің айтуынша, өңірдің әлеуметтік-экономикалық дамуы, өнеркәсіп орындарының тұрақты жұмысы және тұрғындардың күнделікті тұрмыс-тіршілігі энергетика саласымен тікелей байланысты. Осы ретте МАЭК кәсіпорнының облыс өміріндегі орны ерекше. Кәсіпорын өңірді электр және жылу энергиясымен, сондай-ақ сумен қамтамасыз етуде стратегиялық маңызға ие. Сондықтан МАЭК-тің тұрақты әрі үздіксіз жұмыс істеуі – тек бір мекеменің емес, тұтас облыстың энергетикалық қауіпсіздігі мен әлеуметтік тұрақтылығының кепілі.«Президент Жолдауында елімізде энергия тапшылығы әлі де өзекті мәселе екенін ашық айтты. Сондықтан энергетика саласын дамытуда уақытша шешімдермен шектелмей, ұзақ мерзімді әрі жүйелі жұмыстар жүргізу маңызды. Бұл бағытта МАЭК кәсіпорнының өндірістік әлеуетін нығайту, білікті мамандарды даярлау және энергетика қызметкерлеріне қолайлы еңбек жағдайын жасау – өңір үшін басым міндеттердің бірі болуы тиіс. Әсіресе энергетика саласында еңбек етіп жүрген мамандардың еңбегін бағалау, жас кадрларды тарту және олардың кәсіби дамуына жағдай жасау мәселесі назардан тыс қалмауы керек. Себебі энергетикалық қауіпсіздік ең алдымен осы салада еңбек ететін білікті мамандарға байланысты», - деді Кирилл Осин.Сонымен қатар жиында кандидат Людмила Мендыгалиева партияның 2026–2031 жылдарға арналған сайлауалды бағдарламасының негізгі бағыттарын таныстырды. Соның ішінде жастардың сапалы білім алуына тең мүмкіндік жасау, білім беру инфрақұрылымын дамыту және балаларға қауіпсіз әрі жайлы оқу ортасын қалыптастыру мәселелерін талқылады. Кездесу соңында МАЭК ұжымы кандидаттарға сәттілік тілеп, ұсыныс-пікір ортаға салды.
