Ақтауда декреттегі аналар сәбилерімен бірге стретчингпен айналысады

Бүгінгі таңда ана мен бала денсаулығын сақтау, салауатты өмір салтын насихаттау – қоғамдағы маңызды мәселелердің бірі. Осы орайда екі баланың анасы, стретчинг жаттықтырушысы Шырынгүлдің бастамасы көпшілікке үлгі боларлықтай. Үнемі қозғалыста жүретін жаттықтырушысымен otpannews.kz тілшісі арнайы сұхбаттасты. Кейіпкердің пайымынша, жүктілік – диагноз емес, ал бала әйелге кедергі келтірмейді. Бұл сөзге Шырынгүлдің өзі – дәлел. Тұңғышы 1 жаста болғанда стретчингпен айналыса бастаған оның қазір екі баласы бар. Босанғанына төрт ай ғана өтсе де Шырынгүл залға қайта оралып, қыз-келіншектерді жаттықтырып жүр. «Мен бұл салада жүргелі биыл – 3 жыл. Декретте отырған кезде өзім жаттығу үшін стретчингке келдім. Қыз-келіншектер қарапайым әрі пайдалы жаттығуларды білмейтінін көргенде ішіп ашып, “мен жаттықтырушы боламын” деген ой түйдім. Үш ай оқып, бірден топ аштым. Содан бері біраз уақыт өтті. Қазір екі балам бар»,- деді Шырынгүл Лесбаева. Шырынгүл стретчинг жаттықтырушысы қызметін атқарып, денсаулықты күту қажет екенін өз тәжірибесімен дәлелдеп келеді. Ол тек қыздарды ғана емес, декреттегі ана мен баланы қатар қабылдап, белсенді өмір салтын насихаттайды. Мәселен, «Ана мен сәби» тобына келетін жас аналар аптасына 3 рет тұрақты түрде жаттығады. Мұнда дүниеге келгеніне бірнеше ғана ай толған сәбилер мен жасқа толған бүлдіршіндер де бар. «Мен жүктіліктің 37-аптасына дейін осы залда жүріп, қыздармен бірге жаттықтым. Ал 38-аптада босанып, екінші рет ана болдым. Арада бір ай өткесін залға қайта оралып, жұмысыма кірістім. Үнемі қозғалыста жүргендіктен маған осы өмір салтым ұнайды. Жалпы, босанғанына 3 ай толған қыз-келіншектерді қабылдаймыз. Ал кесір тілігі арқылы босанған жандар жаттығуды 6 айдан кейін бастаған жөн. Бірақ ескеру қажет, әр адам өзінің физикалық күйін, әл-ауқатын жақсы біледі. Сондықтан әйел өзін қашан дайын сезінсе, сол кезде жаттыға бастаса болады»,- дейді стретчинг жаттықтырушысы. «Балаға дені сау ана қажет» деген ұстанымды басшылыққа алған жас босанған аналар осы жерге келіп, аяқ-қол бұлшық еттерін шынықтырады, белдегі ауырсынуды басып, жүктіліктен кейінгі ішті кетіруге жұмыстанады. Стретчинг жаттығуларына келетін нәзік жандылардың қатары тек жас келіншектермен шектелмейді. Шырынгүлдің айтуынша, мұнда тіпті 60 жастағы аналар мен әжелер де қатысып, денсаулықтарын күтеді. Жаттықтырушының басты мақсаты – тек сымбатты мүсін қалыптастыру ғана емес, дені сау әйел болу және өзгелерге де осы бағытта қол ұшын созу. Ол омыртқаның қисаюы, жамбас сүйек пен белдің ауырсынуының алдын алуға көмектеседі. Сонымен қатар Шырынгүл адам ағзасының қалыпты жұмыс істеуін қадағалап, жатырдың түсуіне жол бермеуді басты назарда ұстайды. Өйткені дені сау ана – бақытты отбасы мен салауатты қоғамның кепілі.