Ақмарал Берекет

16:06, 6 қараша 2026

Нұрдәулет Қилыбай Бейнеу ауданының тұрғындарымен кездесті

OTPANNEWS.KZ. - Маңғыстау облысының әкімі Нұрдәулет Қилыбай жұмыс сапарымен Бейнеу ауданына барып, тұрғындармен кездесті. Жиында ауданның әлеуметтік-экономикалық даму барысы, атқарылған жұмыстар мен алдағы кезеңге жоспарланған жобалар баяндалып, халықтың ұсыныс-пікірлері тыңдалды. Бұл туралы Маңғыстау облысы әкімінің баспасөз қызметі хабарлады.Алдымен аудан әкімі Рахымжан Шалбаев 2026 жылдың тоғыз айындағы әлеуметтік-экономикалық даму қорытындылары және алдағы жылдарға арналған жоспарлар туралы есеп берді.Қазіргі таңда Бейнеу ауданының халқы 71 мыңнан асады. Биылғы тоғыз айдың қорытындысы бойынша өнеркәсіп өнімінің нақты көлем индексі 97,5 пайызды, негізгі капиталға салынған инвестиция көлемінің индексі 136,8 пайызды құрады. Есепті кезеңде 16,3 мың шаршы метр тұрғын үй пайдалануға беріліп, құрылыс жұмыстарының нақты көлем индексі 101,9 пайыз болды.Ауданда 25 мемлекеттік және бір жекеменшік мектеп, екі колледж жұмыс істейді. Биыл Бейнеу ауылында 225 орындық жекеменшік балабақша ашылды. Білім сапасын арттыру және оқу орындарының материалдық-техникалық базасын нығайту жұмыстары да жалғасып жатыр. Өткен жылы мектептердің робототехника, химия, биология, физика және STEM пәндік кабинеттерімен қамтылу көрсеткіші 95,7 пайызға жетті.Аудан басшысының айтуынша, ауданда 12 мемлекеттік және екі жекеменшік медициналық ұйым халыққа қызмет көрсетеді.Қазіргі таңда аудандық аурухананы ауданаралық көпбейінді аурухана санатына ауыстыру мақсатында күрделі жөндеу жүргізіліп жатыр. 11 блоктың алтауында жоспарға сәйкес, А және А1 блоктарын қараша айының соңында, қалған блоктарды 2027 жылдың бірінші тоқсанында пайдалануға беру көзделген. Сонымен қатар Сарға, Төлеп және Тұрыш ауылдарындағы фельдшерлік-амбулаториялық пункттерге, Ақжігіт ауылындағы дәрігерлік-амбулаториялық ғимаратқа күрделі жөндеу жұмыстары жүргізілді.Ауданда мәдениет және спорт инфрақұрылымын дамыту бағытында бірқатар жұмыс атқарылды. Боранқұл ауылдық мәдениет үйі мен Сыңғырлау ауылдық клубында жөндеу жұмыстары жүргізілді. Бейнеу мәдениет үйінің материалдық-техникалық базасы жаңартылып жатыр. Жұмыстарды желтоқсан айында аяқтау жоспарланған.Биыл Боранқұл ауылында 23 штаттық бірлігі бар спорт залы, ал Бейнеу ауылында 62 орындық оқу залы бар аудандық кітапхана пайдалануға берілді.Аудан тұрғындарының 97,7 пайызы орталықтандырылған ауыз су жүйесіне қосылған. Қазіргі уақытта Сарға ауылында су тазарту ғимараты мен ауылішілік су құбырын салу жұмыстары жүргізіліп жатыр. Жобаның орындалу деңгейі 90 пайызға жетті.Жолаушылар тасымалы саласында ауданда жаңартылған 61 автобус халыққа қызмет көрсетуде. Бейнеу ауылындағы жаңа теміржол вокзалының құрылысы да жалғасуда. Нысанды жыл соңына дейін пайдалануға беру жоспарланған.Бейнеу астық терминалы биыл тоғыз айда 3 420 тонна бидай ұнын және 6 240 тонна құрама жем өндірді. Өнімдер облыстың Бейнеу, Қарақия, Түпқараған, Мұнайлы және Маңғыстау аудандарына жеткізіліп, Ақтау мен Жаңаөзен қалаларына тапсырыс бойынша жөнелтіледі.Жыл басынан бері ауданда төрт инвестициялық жоба жүзеге асырылып, нәтижесінде 68 жаңа жұмыс орны ашылды. Ал 2027-2030 жылдарға арналған инвестициялық жобалар пулына жалпы саны 12 жоба енгізілген. Оларды жүзеге асыру нәтижесінде 625 жаңа жұмыс орнын ашу жоспарланып отыр.Кездесу барысында тұрғындар жол сапасы, ауыз су, білім беру, медициналық қызмет көрсету, әлеуметтік қолдау және тұрғын үй мәселелеріне қатысты сауалдарын ортаға салды.Облыс әкімі Нұрдәулет Қилыбай көтерілген мәселелердің әрқайсысына назар аударып, аудан әкімі мен тиісті басқарма басшыларына оларды зерделеп, заңнама аясында шешуді тапсырды.

Otpan News

09:43, 5 қараша 2026

Маңғыстаулық дзюдошылар Қазақстан чемпионатында үш медаль жеңіп алды

OTPANNEWS.KZ – 23 жасқа дейінгі жастар арасында дзюдодан Қазақстан чемпионатында Маңғыстау облысының құрамасы үш медаль жеңіп алды.3–4 қараша күндері Жезқазған қаласында өткен ел біріншілігінде Гүлдана Теңгелбаева +78 келі салмақ дәрежесінде алтын медаль иеленді. Ол финалдық кезеңде қарсыластарынан басым түсіп, Қазақстан чемпионы атанды.57 келі салмақта өнер көрсеткен Аружан Сәрсенова финалға дейін жетіп, күміс жүлдегер атанды. Ал 74 келіде сынға түскен Ақниет Қонысбай жарыстың қола жүлдегері болды.

Otpan News

10:59, 6 қараша 2026

Қазақстан Президенті мен Иордания Королі келіссөз жүргізді

Ақордада елімізге ресми сапармен келген Иордан Хашимит Корольдігінің Королі II Абдалла бен әл-Хусейнді қарсы алу рәсімі өтті.Мәртебелі мейманның құрметіне Әуе қорғанысы күштерінің тікұшақтары Қазақстан мен Иорданияның Мемлекеттік туларын желбіретіп, Ақорда алдынан ұшып өтті.Салтанатты іс-шара барысында Қасым-Жомарт Тоқаев пен II Абдалла бір-біріне ресми делегация мүшелерін таныстырды. Құрмет қарауылы ротасының бастығы рапорт берген соң Президент оркестрі екі елдің әнұрандарын орындады.Келіссөз аясында Мемлекет басшысы Иордания Королі ІІ Абдалла бен әл-Хусейннің Қазақстанға ресми сапары елдеріміз арасындағы берік достықты, өзара құрмет пен ынтымақтастықты көрсететінін атап өтті.– Иордания – араб әлеміндегі уақыт тезінен өткен сенімді серіктесіміз. Кейінгі жылдары ықпалдастығымыз қарқын ала бастады. Біз арамызда орнаған түрлі деңгейдегі берік саяси диалогты жоғары бағалаймыз. Былтыр екіжақты қарым-қатынас үшін ерекше кезең болды, бір-бірімізге сапармен бардық. Келіссөздер қорытындысы бойынша бірлескен мәлімдеме қабылданды, сондай-ақ министрліктеріміз бен ведомстволарымыздың және іскерлік орта өкілдерінің арасында көптеген құжатқа қол қойылды. Мұның бәрі көпжақты ынтымақтастығымызды одан әрі ілгерілетуге септігін тигізді, – деді Президент.Қасым-Жомарт Тоқаев Қазақстан өзара мүддеге сай барлық салада қол жеткізілген уағдаластықтарды нақты іске асыруға баса мән беретініне тоқталды. Экономикалық ықпалдастық қазақ-иордан қарым-қатынасының негізгі қозғаушы күші болып қала береді. Сонымен қатар академиялық және ғылыми байланыстарды нығайту, өзара туристер ағынын арттыру арқылы мәдени-гуманитарлық ынтымақтастықты кеңейтудің әлеуеті зор.Мемлекет басшысы екі елдің халықаралық және өңірлік күн тәртібіндегі өзекті мәселелерді шешу тәсілдері ұқсас екеніне назар аударып, Иордания Королінің достық байланыстарды нығайтып, қос халықты жақындастыруға қосқан үлесін жоғары бағалады.– Сіздің көреген басшылығыңызбен Иордания парасаттылық әрі байыптылық үлгісін көрсетіп, халықаралық аренада Таяу Шығыс және одан тысқары аймақтардағы бейбітшілік пен тұрақтылықтың дәйекті жақтаушысы ретінде кеңінен танылды. Осы орайда, Қазақстан Өзіңіз он жылдан аса уақыт бұрын бастаған Ақаба процесін жоғары бағалайды. Мұндай форматтағы кездесуге Орталық Азияда алғаш рет ұйымдастырушылардың бірі ретінде қатысу – біз үшін үлкен мәртебе. Сессия бүгінде аса өзекті саналатын жасанды интеллект саласындағы қауіпсіздік тақырыбына арналып отыр. Саммит Орталық Азия өңірінің ұстанымын білдіріп, бейбітшілік пен қауіпсіздікті сақтау жөніндегі бірлескен күш-жігерімізге тың серпін сыйлайтынына сенімдімін, – деді Президент.Король ІІ Абдалла бен әл-Хусейн ықыласпен қарсы алғаны үшін Қасым-Жомарт Тоқаевқа алғыс айтып, Қазақстан мен Иорданияны бұрыннан келе жатқан қарым-қатынас, өзара құрмет, сондай-ақ бейбітшілік пен тұрақтылықты нығайту ісіндегі ортақ ұстаным байланыстыратынын жеткізді.– Өзіңіз еске салғандай, былтыр бір-біріміздің елімізге жасаған сапарларымыз екіжақты қарым-қатынасты ілгерілетуге ерекше серпін берді. Біз қол жеткізілген уағдаластықтарды одан әрі өрбітіп, сауда, инвестиция, туризм, технология және қорғаныс секілді негізгі бағыттарда ынтымақтастықты кеңейтуге ниеттіміз, – деді Иордания Королі.Король ІІ Абдалла Ақаба процесі аясындағы кездесулердің жаңа раундын бірлесе ұйымдастырғаны үшін Қасым-Жомарт Тоқаевқа шынайы ризашылығын білдірді. Оның айтуынша, бұл екі елдің қауіпсіздік саласындағы өңірлік және жаһандық сын-қатерлерді шешуге бейілдігін көрсетеді.Осы орайда, Иордания Королі өңірлік қауіпсіздікті қамтамасыз ету, сондай-ақ терроризм мен экстремизмге қарсы күрес ісінде Қазақстанмен ықпалдастықты кеңейтуге мүдделі екенін растады.

Инсульттің алдын алу: Ақтауда дәрігерлер тегін тексеру өткізді