Маңғыстаулық таэквондошы Корея төрінде топ жарды

Маңғыстау облысының спортшысы Наурызбек Нұрғазыев таэквондодан (WT) Оңтүстік Кореяда өткен халықаралық CHUNCHEON KOREA OPEN 2026 турнирінің жеңімпазы атанды, деп хабарлайды otpannews.kz. Беделді дода 18–22 шілде аралығында Чунчхон қаласында ұйымдастырылып, оған әлемнің 71 елінен 4000-нан астам спортшы мен ресми өкіл қатысты. Әлемнің үздік таэквондошылары бас қосқан жарыста Қазақстан құрамасының сапында өнер көрсеткен жерлесіміз барлық белдесуінде айқын басымдық танытты. Наурызбек алғашқы айналымда алаң иесі – Оңтүстік Корея спортшысын 2:0 есебімен жеңді. Кейін Тайбэй өкілінен 2:1 есебімен басым түсіп, ширек финалда өз отандасын дәл осындай есеппен жарыс жолынан шығарды. Жартылай финалда австралиялық қарсыласын 2:0 есебімен сенімді ұтса, финалда Қытай спортшысын да 2:0 есебімен тізе бүктіріп, чемпиондық тұғырға көтерілді. Осылайша маңғыстаулық таэквондошы бес бірдей қарсыласынан басым түсіп, халықаралық турнирдің алтын медалін жеңіп алды. Жеңімпаз Ақтауға оралғаннан кейін оны және бапкерлерін Қонысбай Бектілеу атындағы Маңғыстау облыстық таэквондо (WT) және паратаэквондо (WT) федерациясының вице-президенті Серік Ғұсман арнайы қабылдады. Федерация атынан спортшыға қаржылай сыйақы мен спорттық киімдер табысталды. Серік Гимиранұлы өз сөзінде Наурызбек Нұрғазиев пен оның бапкерлерінің қажырлы еңбегіне жоғары баға беріп, халықаралық аренада Қазақстан мен Маңғыстау облысының абыройын асқақтатқаны үшін алғысын жеткізді. Айта кетейік, Наурызбек Нұрғазиев бүгінде еліміздегі жетекші спорт оқу орындарының бірі – Кәркен Ахметов атындағы Олимпиада резервінің республикалық мамандандырылған мектеп-интернат-колледжінде (Алматы қаласы) білім алады. Дарынды спортшыны халықаралық жарыстарға Серік Ислам, Саламат Ізденов және Құрбанбай Қыдырбаев сынды тәжірибелі бапкерлер дайындап келеді. Сондай-ақ оның спорттық шеберлігінің шыңдалуына алматылық жаттықтырушы Төлеген Тілеумұратовтың да қосқан үлесі зор.