«Қуанышты күн»: Ақтауда балаларға оқу құралдары табысталды

Ақтаудағы Достық үйінде «Жомарт жан» орталығының ұйымдастыруымен «Қуанышты күн» қайырымдылық акциясы аясында балалар мен олардың ата-аналарына арналған «Алтын күз» және «Мектепке жол» мерекелік шаралары өтті, деп жазады otpannews.kz.Аталған қайырымдылық шарасының негізгі мақсаты – балаларға қолдау көрсету, жаңа оқу жылына қажетті құрал-жабдықтарын алуға жәрдемдесу және қоғамдағы өзара көмек пен жанашырлық құндылықтарын дәріптеуге бағытталған. «Мектепке жол» шарасы барысында арнайы шақырылған 30-ға жуық баланың ата-анасына мектеп құралдарын сатып алуға арналған ақшалай сертификаттар табысталды. Сондай-ақ, «Алтын күз» мерекелік шарасы ұйымдастырылып, дихандардың берекелі күздің қуанышын бөлісуге басымдық берілді. Шараға қолдау көрсеткен «Ала-Тоо» қырғыз этномәдени бірлестігінің өкілдері қонақтарға сый-құрмет көрсетіп, дастархан жайып, қауын-қарбыздан дәм татқызды.Бұл ретте «Қоғамдық келісім» мекемесінің басшысы Амангүл Жайылханова қайырымдылық шарасының маңыздылығына тоқталып өтті. «Қайырымдылық – қоғамды біріктіретін, адамдарды бір-біріне жақындататын ізгі құндылық. Бүгінгі шараның ерекшелігі – балаларға мектепке қажетті қолдау көрсетумен қатар, береке мен бірлікті дәріптеген «Алтын күз» мерекесімен ұштасуында. Осындай игі бастамалар этносаралық татулықты нығайтып, қоғамдағы өзара жанашырлықты арттыра түседі. Балаларға қуаныш сыйлау – баршамызға ортақ міндет әрі үлкен жауапкершілік», – деді Амангүл Жайылханова.Ізгі шараға «Жомарт жан» орталығының мүшелері Ирина Беляева, Зарета Фаталиева, Хитеш Вадодария, Римма Муханова, Дәурен Мыңбаев, Таги Тагиев, Ильгар Мамедов, Шамсадин Гусейнов, Раушан Аймұрзаева және шараға қолдау білдірген «Жомарт жан» орталығының мүшесі Наркозуев Маматкадыр сынды жандар демеушілік қолдау көрсетіп отыр. Өз кезегінде қайырымдылық акциясының шарапатын көрген ата-аналар демеушілер мен ұйымдастырушыларға ризашылықтарын білдіріп, балаларға көрсетілген қолдаудың маңыздылығын атап өтті.