Енді болашақ мұғалімдер ауызша емтихан тапсырады: ҰБТ жүйесіне түбегейлі өзгерістер енеді

Қазақстанда педагогикалық жоғары оқу орындарына түсу тәртібі өзгеріп, ҰБТ форматы жаңғыртылады. Енді мұғалім болғысы келетін талапкерлердің тек білімі ғана емес, сонымен қатар сыни ойлау қабілеті мен коммуникациялық дағдылары да сынға түспек, деп хабарлайды otpannews.kz сайты. Бұл туралы Премьер-министрдің орынбасары Аида Балаева мәлімдеді. Оның айтуынша, білім саласындағы бұл қадамдар жай ғана кезекті реформа емес, адами капиталды дамытуға бағытталған сапалы жаңа кезең.Келесі жылдан бастап педагогикалық мамандықтарға түсу үшін гибридті бағалау жүйесі енгізіледі. Бұл дегеніміз – ҰБТ нәтижесі арқылы пәндік білімін тексеріп, ауызша емтихан арқылы коммуникациялық дағдыны анықтау. Мұндай өзгерістің басты себебі – педагог мамандығының ерекше жауапкершілігінде. Бұдан былай халықаралық сарапшылармен бірлесіп әзірленген Admissions Insight Test тапсырмалары арқылы талапкердің ойлау қабілеті мен талдау дағдылары ескеріледі.Үкімет ҰБТ жүйесін тұтастай жаңғыртуды көздеп отыр. Ең негізгі өзгерістер қатарында ҰБТ-ны бір рет тапсыру жүйесін бекіту бар. Бұл грант конкурсына қатысу үшін объективті баға болады. Ал дайындық үшін сынақ тестілеулері сақталады. Сондай-ақ жоғары оқу орындарына шартты түрде қабылдау жүйесі тоқтатылуы мүмкін. Статистика көрсеткендей, шартты түрде оқуға түскендердің 60%-ға жуығы жыл соңында шекті баллды жинай алмайды.Бұдан бөлек жоғары оқу орындарына дарынды жастарды өз бетінше іріктеуге мүмкіндік беру қарастырылуда.«ҰБТ жүйесін өзгерту – тестілеуден бас тарту емес. Бұл – дарынды талапкерлерді әділ іріктеуге бағытталған қадам. Білім саласы экономиканың сұранысына жауап беретін, нақты дағдыларды меңгерген мамандарды даярлауы тиіс»,- деді Аида Балаева.Аида Балаеваның айтуынша, қазіргі еңбек нарығы мен әлемдік трендтер жаңа талаптар қойып отыр. Педагогикалық оқу орындарына кездейсоқ адамдардың бармауы, керісінше, бала психологиясын түсінетін, жан-жақты тұлғалардың келуі — мемлекеттің басты басымдығы.Жаңа жүйе талапкерлердің болашақ мамандығын саналы түрде таңдауына және білім сапасының артуына негіз болмақ.