16:00, 3 қараша 2026
Ақтауда 10 мың көрерменге арналған жаңа стадион салынып жатыр
OTPANNEWS.KZ - Жаңа спорт кешені бұрынғы резиденция аумағында орналасқан. Жалпы жер көлемі – 17,29 гектар. Қазіргі уақытта құрылыс алаңында қазаншұңқыр қазу, жерді дайындау және аумақты ұйымдастыру жұмыстары атқарылуда. Нысанға қажетті арнайы техника жұмылдырылған. Құрылыс жұмыстары өндірістік кестеге сәйкес жүргізіліп жатыр,- деп хабарлайды Қоғамдық коммуникация орталығы.Жоба жетекшісі Бағдат Абеевтің айтуынша, негізгі стадион 10 мың көрерменге арналған. Өлшемі 105×68 метр болатын футбол алаңы табиғи көгалмен жабдықталып, жылыту және жерасты дренаж жүйелерімен қамтамасыз етіледі.-Стадион Қазақстан футбол федерациясының 5-санатына және UEFA-ның 4-санатына сәйкес жобаланған. Бұл нысанда республикалық және халықаралық деңгейдегі футбол жарыстарын өткізуге мүмкіндік береді. Сонымен қатар жоба аясында 150 орындық футбол академиясы салынады. Оның құрамында жатақхана, асхана, шағын футбол залы, жаттығу және функционалдық залдары, медициналық-оңалту блоктары мен оқу кабинеттері қарастырылған, - деді Бағдат Абеев.Сондай-ақ кешен аумағында екі жаттығу алаңы, автотұрақ, бақылау-өткізу бекеттері, инженерлік және қосалқы нысандар бой көтереді.Стадионның сәулеттік тұжырымдамасы Каспий жағалауындағы Ақтау қаласының ерекшеліктерін бейнелейді. Нысанның сыртқы келбеті Каспийдің інжу-маржанына ұқсатып жасалған.Кешен пайдалануға берілгеннен кейін тұрғындардың спортпен шұғылдануына, жас футболшыларды даярлауға және өңірде республикалық әрі халықаралық деңгейдегі жарыстарды өткізуге мүмкіндік артады.Айта кетейік, Мемлекет басшысы Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» атты Жолдауында бұқаралық спортты дамыту, спорт инфрақұрылымын жетілдіру және өскелең ұрпақтың спортпен жүйелі айналысуына жағдай жасау қажеттігін атады.
