Маңғыстау ауданына қарасты Шебір ауылында Пір Бекет атаның 275 жылдығы мен Ұлы Жеңістің 80 жылдығына арналған «Ардагерлер рухына тағзым» атты кең ауқымды мәдени-рухани шара басталды, деп хабарлайды otpannews.kz.

Мерекелік жиынға аудан әкімінің орынбасары Жандос Романұлы мен ауыл тұрғындары қатысты. Бағдарлама ауыл тарихына арналған энциклопедиялық кітаптың тұсаукесерінен басталды. Бұл туынды — Шебірдің бай мұрасын бүгінгі ұрпаққа жеткізетін маңызды еңбек.

Ұлттық құндылықтарды ұлықтаған шара барысында 16 шақырымдық ошақ бәйге, 18 шақырымдық ұшқыр бәйге, қазақша күрес пен қол күресінен сайыстар ұйымдастырылды.

Бұл шара — ауыл тұрғындарының бірлігін бекемдеп, өскелең ұрпаққа салт-дәстүр мен ұлттық спортты насихаттауға бағытталған, — деді аудан әкімінің орынбасары Жандос Романұлы.

Кештің соңын эстрада әншілері көркем концерттік бағдарламамен түйіндеді. Айта кетейік, мерекелік жиын ертең де жалғасын таппақ.