Биыл Өзбекстаннан келген әр екінші иммигрант Алматыға не Маңғыстауға қоныстанған
Ұлттық статистика бюросының мәліметінше, қаңтар-қыркүйек айларында Қазақстанға басқа елдерден 16,2 мың адам көшіп келген. Оның ішінде 8,3 мың адам немесе 51% бұрын Өзбекстанда тұрған, деп хабарлайды otpannews.kz сайты.
DataHub_FCBK Telegram-арнасының талдауына сәйкес, Өзбекстаннан келгендердің абсолюттік саны соңғы он жылдан астам уақыт ішінде ең жоғары көрсеткішке жетіп отыр. Бұдан көп адам соңғы рет 2013 жылы келген.
Өзбекстанның үлесі тұрақты тұруға келгендердің жалпы санында 2014 жылдың қаңтар-қыркүйек айларынан бері алғаш рет 50%-дан асты. Жалпы алғанда, соңғы 15 жылға көз жүгіртсек, жартысына жуық көрсеткіш 2010 жылдардың басында байқалған, кейін республикадан келетін иммигранттардың азаюымен бірге төмендей бастаған.
2025 жылдың қаңтар-қыркүйек арасында Өзбекстаннан келгендердің саны жылдық мәнде онша күрт өспеген, 11%-ға ғана артқан, алайда олардың үлесі бірден 15 пайыздық пунктке көтерілген.
«Неден? Мәселе мұнда тек Өзбекстанда емес. Жалпы иммигранттар санының өзі азайды: өткен жылғы 20,4 мыңнан биыл 16,2 мыңға дейін. Бұл ең алдымен Ресейден көшіп келгендердің күрт қысқаруынан (-47%, 3,1 мың адамға дейін), сонымен қатар Моңғолиядан келгендердің саны былтырғы өсімнен кейін бірден 71%-ға төмендеуінен (0,3 мың адамға дейін) болып отыр», – деп есептейді сарапшылар.
Ұлттық статистика бюросы иммигранттарды тек этникалық құрам бойынша жіктейді. Олардың басым бөлігі – қазақтар. Тұрақты тұратын өңір ретінде келгендердің көбі, ұлтына қарамастан, Алматы облысын (41%) немесе Маңғыстау облысын (22%) таңдайды.
