Ақтауда республикалық пікірсайыс турнирі басталды

Бүгін Ақтауда Маңғыстау облысы әкімінің кубогі үшін “Mangystau CUP” республикалық пікірсайыс турнирі басталды, деп хабарлайды otpannews.kz сайты. 

Бұл жоба облыстық “Soz Battle” жобасы аясында ұйымдастырылып отыр. Іс-шараның ашылу салтанатында облыс әкімінің орынбасары Аббат Өрісбаев сөз сөйлеп, қатысушыларды құттықтады. 

“Құрметті қатысушылар! Бүгінгі пікірсайыс турнирінің ашылуымен шын жүректен құттықтаймын! Болашақ – жастардың қолында. Әсіресе, тілі – орақты, сөзі – жүйелі жастардың! Біздің өңірге елдің түкпір-түкпірінен бақ сынауға келгендеріңізге рахмет! Әрқайсыңыздың биіктен көрінулеріңізге тілектеспін!”- деді Аббат Өрісбаев. 

Жалпы жүлдеқоры 1,5 млн теңгені құрайтын турнирге ел бойынша 17 өңірден 100-ге жуық қатысушы келді. Әр топта 2 адамнан бақ сынайтын қатысушылардың жасы 18 бен 34 аралығында. 

Пікірсайыс турнирінде орта және шағын бизнес мәселелері, ауыз су мен АЭС және өзге де экономикалық, әлеуметтік маңызды тақырыптар талқыланады.  

“ҚР 2023-2029 жылдарға арналған мемлекеттік жастар саясатының тұжырымдамасын іске асыру аясында облыстық жастар саясаты мәселелері жөніндегі басқармасының ұйымдастыруымен жастардың сыни ойлауын, шешендік қабілетін арттыру мақсатында республикалық деңгейдегі төрешілер мен сарапшылардың қатысуымен облыс әкімінің Кубогі үшін «Mangystau CUP» республикалық пікірсайыс турнирі басталды. Бүгінгі іс-шарада жергілікті қатысушылардан бөлек, Қосанай, Ақмола, Алматы СҚО, БҚО, Жамбыл, Түркістан, Ұлытау облыстарынан келген топтар бақ сынайды. Ақтаулық пікірсайысшыларға арналған бұл жоба араға 8 жыл уақыт салып өтіп жатыр”,- деді Маңғыстау облысы жастар саясаты жөніндегі басқарма басшысы Мұқаш Оралбай. 

Жарыс американдық парламенттік (АПФ) және Линкольн–Дуглас (ЛД) форматында өтеді. Іріктеу кезеңі мен финалдық сайыстар АПФ форматында ұйымдастырылса, турнирдің «Үздік спикерін» анықтайтын ойындар ЛД форматында өткізіледі.